चिठीसँगै एउटा फोटो पठाई दिनुस् है-सफल गोले तामाङ

चिठीसँगै एउटा फोटो पठाई दिनुस् है
मलाई चप्पल छोरोलाई भोटो पठाई दिनुस् है
सधैंभरी कच्कच गर्छन् डाँडाघरे साउले
छिट्टैगरि रकम मोटो पठाई दिनुस् है

२.
गगनचुम्बी महलमा भुइँको चर सरह सम्झिनु
मुस्कुराएको फूलमा जराको भर सरह सम्झिनु
नगर प्रिय कत्ती पनि शंका नगर मलाई मेरो वाचा
ढुङ्गामा कुँदिएको अक्षर सरह सम्झिनु

३.
मडारी रह्यो बादलको घेरो तिमी नहुँदा खेरि
भिजी रह्यो पछ्यौरीको फेरो तिमी नहुँदा खेरि
सम्झना मै समय बिताउन गाह्रो रैछ प्रिय
आफ्नै सिरानी भयो अफ्ठेरो तिमी नहुँदा खेरि

४.

सुन्सुम्याउँदै कल्पौं नदिलाई नतमस्तक बस्ने तिर बनूँ
फुलाउँदै अनेकौं फूल छातिमा अडिग रहने भिर बनूँ
हार मेरै होओस् सधैं तिमीलाई सन्तोष मिलोस्
सधैं सहेरै तिरस्कार तिम्रो जीतमा छछल्किने अबिर बनूँ

५.

मन, मुटु चिथोर्ने अमिलो घात मात्रै हो
पुस्तौंसम्म सम्झिने मीठो बात मात्रै हो
साँध नाघेर अठार हात किन लम्किन्छौ छिमेकी
सास गएपछि आफ्नो हुने पाँच हात मात्रै हो

मन्थली नगरपालिका-१४, रामेछाप