आयोजक आफैले हात पार्यो प्रथम मेयर कप खुल्ला फुटबल प्रतियोगिताको उपाधि

रामेछाप,असार ३०,

रामेछाप जिल्लाको रामेछाप नगरपालिकामा जारी रामेछाप जिल्लाकै ठुलो धन राशिको प्रथम मेयर कप खुल्ला पुरुष फुटबल प्रतियोगिताको उपाधि आयोजक टिमले हात पारेको छ । आयोजक टिमले आकाशे ब्वाईज क्लबलाई ३ — ० गोल अन्तरले पराजित गरेसँगै प्रथम मेयर कप खुल्ला पुरुष फुटबल प्रतियोगिताको उपाधि हात पारको हो । खेलमा रामेछाप जिल्लाकै ठुलो पुरस्कार मानिइएको प्रथम पुरस्कार स्वरुप ३ लाख रुपैयाँको साथमा शिल्ड आयोजक आफैले हात पार्न सफल भएको हो ।

प्रतियोगिता दोश्रो हुन सफल आकाशे ब्वाईज क्लब मन्थलीले द्धितिय पुरस्कार स्वरुप २ लाख रुपैयाँ र शिल्ड प्राप्त गरेको छ । यस्तै प्रतियोगितामा तृतिय स्थान हात पार्न सफल लर्ड बुद्ध क्लब सिन्धुलीले दिपशिखा क्लब मन्थलीलाई ३ —० गोल अन्तरले पराजित गरेको छ ।
तृतिय स्थानमा चिक्त बुझाउँदै लर्ड बुद्ध क्लब सिन्धुलीले १ लाख रुपैयाँ र शिल्ड प्राप्त गरेको छ । प्रतियोगितामा उत्कृष्ट खेल प्रदर्शन गर्ने खेलाडीको पुरस्कार आकाशे ब्वाईज क्लबका खेलाडी मनोज श्रेष्ठले पाउन सफल भएका छन ।

प्रतियोगितामा उत्कृष्ट गोल रक्षकको पुरस्कार आयोजक रामेछाप नगरपालिका टिमका गोल रक्षक अंकित शाहिले पाउन सफल भएका छन ।

प्रतियोगितामा धेरै गोल गर्न सफल सर्वाधिक गोलकर्ता तर्फको पुरस्कार आयोजक रामेछाप नगरपालिका टिमका खेलाडी बबि तम्बेबाले हात पारेका छन् । गएको बुधबारदेखि शुरु भएको प्रतियोगीतामा १२ वटा समुहको सहभागीत रहेको थियो ।