म्याद नाघेका कस्मेटिक सामग्री ठूलो परिमाणमा जफत

भदौ ७

जिल्ला प्रशासन कार्यालय रामेछापले चाडपर्वलाई लक्षित गरी हिजो र अस्ती मन्थली वजार अनुगमन गरेको छ । अनुगमनबाट कस्मेटिक पसलमा बिक्रीका लागि राखिएका म्याद गुज्रेका सामग्री ठूलो परिमाणमा जफत गरेको छ । पछिल्लो समय रामेछापमा व्यवसायीहरूले मनलाग्दी तरिकाले सामान बिक्री–वितरण गरेको भन्ने गुनासो उपभोक्ताबाट आएपछि जिल्ला प्रशासन कार्यालयले स्थानीय निकाय, नगरपालिका, प्रहरी, उपभोक्ता मञ्च, नागरिक समाज र पत्रकारहरूको रोहबरमा बजार अनुगमनलाई तीव्रता दिएको हो । अनुगमनका क्रममा केही कस्मेटिक पसल विना दर्ता सञ्चालन भएको पाइएकाले तिनलाई एक हप्ताभित्र दर्ता गर्न निर्देशन समेत दिइएको छ ।

त्यस्तै कस्मेटिक पसलमा बिक्री–वितरण गर्न राखिएका सामग्रीको पनि गुणस्तर कस्तो छ र सामानको मूल्यसूची राखिएको छ छैन भन्ने विषयमा अनुगमन गरिएको छ । जफत गरिएका सामग्रीमा हेयर जेल, दारी काट्दा प्रयोग गरिने भिजन, सेन्ट, सेम्पो, अफ्टर सेभ लोसन, ललिपप चक्लेट, पपैया क्रिम, हाजमोला, पान स्विट, सुर्ती, बिँडी, जिरा, धनियाँ, खानेतेल, तास, गुट्खा, डिटोल, सौन्दर्य क्रिम, लिची चकलेट लगायतका सामग्री जफत गरिएको जिल्ला प्रशासन कार्यालय रामेछापले जनाएको छ । प्रशासनले सदरमुकाम लगायत जिल्लाका ८ वटै स्थानीय तहका मुख्यमुख्य बजारका सबै स्थानमा पुगेर कडाइका साथ अनुगमन गर्ने पनि जनाएको छ ।