जयवागेश्वरी मन्दिरभित्र अर्को मन्दिर फेला

भदौ २०

पाशुपत क्षेत्रको ग्वलमा रहेको जयवागेश्वरीको मन्दिर पुनःनिर्माणकाक्रममा मन्दिरभित्र अर्को मन्दिर फेलापरेको छ ।

मन्दिरभित्र पुरातात्विक महत्वका तीनओटा गजुरसहितको इँटा र माटोले निर्मित सानो मन्दिर फेलापरेको हो ।

उत्खनन्काक्रममा प्राचीन इँटा र छतमा राख्ने ठूला इँटाहरु पनि फेलापरेका छन् ।

पशुपतिनाथभन्दा पुरानो ठानिएको जयवागेश्वरीको मन्दिरमा वि।सं। २०७२ सालको विनाशकारी भूकम्पले क्षति पुगेको थियो ।

मन्दिरभित्र पहिलो तल्लामा तीनओटा गजुरसमेतको सानो मन्दिर फेलापरेपछि स्थानीयवासीले यसको अध्ययन, अनुसन्धान हुनुपर्ने माग गरेका छन् ।

आठकुना रहेको सो मन्दिरमा अर्को मन्दिरकाबारेमा आफ्नो बाजेलाईसमेत थाहा नभएको मन्दिरका पुजारी ८० वर्षीय मृत्यृन्जय कर्माचार्यले बताए ।

उनले यसको राम्रोसँग अनुसन्धान गरेरमात्र पुनःनिर्माण कार्य अघि बढाउनुपर्ने बताए ।

लिच्छविकालीन यस मन्दिरभित्र जयवागेश्वरीको मूर्तिसहित दायाँ भैरव र बायाँ हात्तीको टाउको नभएको भैरवकोजस्तो रातो गणेशको मूर्ति रहेको छ ।

प्राप्त तीनओटा गजुर रहेको गर्भगृहमा बिहीबार पुजारी र स्थानीयहरुले क्षमापूजासमेत गरेका छन् ।