नयाँ सभामुखबारे नेकपाको किचलोले संसद बन्धक, कांग्रेस आक्रोशित

१२ पुष

काठमाडौँ – सभामुख चयनका विषयमा सत्तारुढ दलभित्र फैलिएको किचलोले संसद अनिर्णयको बन्दी बनेको छ । सत्तारुढ नेकपाले नयाँ सभामुख कसलाई बनाउने भन्ने निर्णय गर्न नसकेपछि संसद बन्धक बनेको हो ।

जनताको आवाज सुनाउने संसदलाई लामो समयदेखि अनिर्णयको बन्दी बनाएको भन्दै प्रमुख विपक्षी नेपाली कांग्र्रेसले आक्रोश पोखेको छ । पूर्ण बहुमतको सरकार चलाइरहेको नेकपाले सभामुख पदका लागि रडाको मच्याएर संसदलाई बन्धक पार्नु नालायकीपन भएको कांग्रेस सांसद पार्वता डिसी चौधरीले आरोप लगाउनुभयो ।
बलात्कारको आरोप लागेका कृष्णबहादुर महराले सभामुख पदबाट राजीनामा दिएपछि संसद सभामुख बिहीन छ । शुक्रबार बस्ने भनिएको बैठकमा सभामुख चयनको प्रक्रिया सुरु हुने सम्भावित कार्यसूची थियो । तर सत्तारुढ नेकपाले नयाँ सभामुख कसलाई बनाउने भन्ने निर्णय लिन नसकेपछि शुक्रबार बस्ने भनिएको बैठक नै स्थगित भयो । संसद सचिवालयका प्रवक्ता रोजनाथ पाण्डेयले अर्को बैठक पुष १६ गते दिउँसो एक बजेका लागि बोलाइएको जानकारी दिनुभयो ।
सभामुख चयनबारे टुंगोमा पुग्न नेकपाका दुई अध्यक्ष केपी शर्मा ओली र पुष्पकमल दाहाल प्रचण्डबीच आज बालुवाटारमा बैठक पनि बसेको थियो । तर उक्त बैठकले पनि सभामुखबारे ठोस निर्णय लिन सकेन । नेकपा संसदीय दलका उपनेता सुवासचन्द्र नेम्वाङले पार्टीका दुईअध्यक्षबीच बैठक बसेको तर के कुराकानी भयो सोबारे आफूलाई थाहा नभएको बताउनुभयो ।

सभामुख छान्न नसकेर संसदलाई बन्धक पारेको विपक्षीको आरोपबारे नेम्वाङले यो विषय सत्तापक्ष र प्रतिपक्षसँगै सम्पूर्ण संसदकै भएकोले छिट्टै निकास निस्कनेमा आफू आशावादी रहेको बताउनुभयो ।

सभामुखका लागि नेकपाभीत्र पूर्व एमाले र पूर्व माओवादी खेमाले दाबी प्रस्तुत गरेका छन् । तर उपसभामुख शिवमाया तुम्वाहाम्फेले आफूलाई सभामुख बनाउने भए मात्रै राजीनामा दिने अडान लिएपछि सहमति जुट्न सकेको छैन । नयाँ सभामुख सुवासचन्द्र नेम्वाङ हुनुपर्ने प्रधानमन्त्री केपी ओलीको प्रस्वावमा अर्का अध्यक्ष दाहाल पनि सहमत रहेको बताइन्छ ।

तर पूर्व माओवादी खेमाले पार्टी एकताका बेला भएको शक्ति सन्तुलनका आधारमा आफूपक्षीय नेताले नै सभामुख पाउनुपर्ने अडान नत्याग्न प्रचण्डलाई चर्को दबाब दिएका छन् ।