विधेयक संसदबाट पारित गर्दै शान्ति प्रक्रियाका बाँकी काम पूरा गर्ने सहमति

माघ ४,

सत्तारूढ नेपाल कम्युनिष्ट पार्टी नेकपा र प्रमुख प्रतिपक्ष दल नेपाली कांग्रेस सत्य निरूपण तथा मेलमिलाप र बेपत्ता छानबिनसम्बन्धी विधेयक अगाडि बढाउन सहमत भएका छन् ।

प्रधानमन्त्रीको सरकारी निवास बालुवाटारमा भएको छलफलमा गएको पुस २८ गते सातै प्रदेशमा गरेको छलफलमा उठेका सुझावका आधारमा सत्य निरूपण तथा मेलमिलाप र बेपत्ता छानबिनसम्बन्धी विधेयकलाई अगाडि बढाउने सहमति भएको प्रधानमन्त्रीका प्रेस सल्लाहकार सूर्य थापाले जानकारी दिनुभयो ।

सातै प्रदेशका द्वन्द्व पीडितका सुझावका आधारमा ऐन संशोधन गर्न विधेयक बनाउन कानुन मन्त्रालयलाई आग्रह गर्न दलहरू सहमत भएका हुन् । विधेयक संसदमा पेश गरेर पारित गर्दै शान्ति प्रक्रियाका बाँकी काम पूरा गर्ने नेताहरुबीच सहमति भएको प्रधानमन्त्रीका प्रेस सल्लाहकार थापाले बताउनुभयो ।

६ वर्षअघि सर्वोच्च अदालतले पीडितमैत्री हुनेगरी ऐन संशोधन गर्न परमादेश दिएको थियो । यस्तै दलहरूबीच दुबै आयोगमा पदाधिकारी नियुक्तिबारे पनि सहमति जुटेको छ । पदाधिकारी सिफारिसका लागि पूर्वप्रधानन्यायाधीश ओमप्रकाश मिश्र संयोजकत्वमा गठित समितिले दिएका नाममा सहमति गर्न दलहरू सहमत भएका छन् ।

समितिको बैठक आज बस्दैछ । समितिले सिफारिस गरेका नाम मन्त्रिपरिषदले पारित गर्नुपर्ने हुन्छ । बिहान भएको छलफलमा नेकपा अध्यक्षद्वय केपी शर्मा ओली र पुष्पकमल दाहाल, कांग्रेस सभापति शेरबहादुर देउवाका साथै नेकपाबाट संसदीय दलका उपनेता सुवासचन्द्र नेम्वाङ, नेकपा नेता खिमलाल देवकोटा तथा कांग्रेस केन्द्रीय सदस्यद्वय मिनेन्द्र रिजाल र रमेश लेखक सहभागी हुनुहुन्थ्यो ।