राष्ट्रियसभा निर्वाचनमा नेकपाको एकलौटी विजय, कहाँ कसले जिते ?

१० माघ,

रामेछाप । राष्ट्रियसभा सदस्यको विहिबार भएको निर्वाचनमा स्थानीय तहतर्फ ९९.१९ प्रतिशत मतदान भएको छ । निर्वाचनका लागि मुलुकका सातै प्रदेशका उच्च अदालत रहेका जिल्लामा निर्वाचन अधिकृतको कार्यालय स्थापना गरिएको थियो ।

राष्ट्रियसभा सदस्यको निर्वाचनमा सबै प्रदेशमा नेकपा गठबन्धन विजयी भएको छ। बिहीबार १८ पदका लागि भएको निर्वाचनमा नेकपाका १६ र राजपाका २ उम्मेदवार निर्वाचित भएका हुन्। प्रदेश २ मा भने नेपाल कम्युनिस्ट पार्टी (नेकपा) र राष्ट्रिय जनता पार्टी नेपाल (राजपां)ं बीच गठबन्धन भएको थियो।

सातै प्रदेशबाट प्रतिनिधित्व हुने महिला समूहतर्फ ७, दलिततर्फ २, अपांगता भएका व्यक्ति वा अल्पसंख्यकतर्फ २ र अन्यतर्फ ७ गरी १८ रिक्त पदमा मतादान भएको हो। निर्वाचनमा विपक्षी कांग्रेसले ७ वटै सिट गुमाएको छ।

परिणाम अनुसार प्रदेश नं १ मा नेकपा विजयी भएको छ । यहाँको तीन पदका लागि भएकोे निर्वाचनमा नेपाल कम्युनिष्ट पार्टी (नेकपा) का तीन उम्मेदवार विजयी भएका हुन् । यसरी विजयी हुनेमा महिलातर्फ इन्दिरा गौतमले ६ हजार ४२६, दलिततर्फ गोपी आछामीले ६ हजार ३३० र अन्यतर्फ देवेन्द्र दाहालले ६ हजार २३४ मतभार ल्याई विजयी भएको जिल्ला निर्वाचन कार्यालय मोरङका सूचना अधिकारी तीर्थ अधिकारीले जानकारी दिनुुभयो ।


उक्त निर्वाचनमा नेपाली काँग्रेसका तर्फबाट महिलामा मीना पुलामीले २ हजार ६२२, दलितमा नीरबहादुर विश्वकर्माले २ हजार ७१८ र अन्यमा राजेन्द्र घिमिरेले २ हजार ७६६ मतभार प्राप्त गरेका थिए । यसैगरी सङ्घीय समाजवादी पार्टीकातर्फबाट महिला कमला बढहीले २६४, दलितमा ज्ञानकुमार परियारले २६४ र अन्यमा भरत दाहालले २६४ मतभारत प्राप्त गरे।

प्रदेशसभा सदस्य ९३ मध्ये ९२ तथा स्थानीय निकयका २७४ मध्ये २७२ सदस्यले मतदान गरेको निर्वाचन अधिकृत अधिकारीले बताउनुुभयो । प्रदेशसभा सदस्यले ९९ प्रतिशत तथा स्थानीय निकायतर्फ ९८ प्रतिशतले मतदान गरेका थिए ।

सुदूरपश्चिम प्रदेशबाट स्वाँर र भट्ट विजयी

राष्ट्रियसभाको अन्य समूह र महिला सदस्यमा क्रमशः सुदूरपश्चिम प्रदेशबाट नेपाल कम्युनिष्ट पार्टी (नेकपा) का तारामान स्वाँर र शारदा भट्ट निर्वाचित भएका छन् । स्वाँरले ३ हजार ७२० मत प्राप्त गरी विजयी भए भने उनका निकटतम प्रतिद्वन्द्वी नेपाली काँग्रेसका प्रताव ठगुन्नाले २ हजार ८४ मत प्राप्त गरे ।

राष्ट्रियसभाको महिला सदस्यमा सुदूरपश्चिम प्रदेशबाट नेकपाका शारदा भट्ट विजयी भएकी छिन् । उनले ३ हजार ७३८ मत प्राप्त गरी विजयी भएकी हुन् । उनका निकटतम प्रतिद्वन्द्वी नेपाली काँग्रेसका तुलसी देवकोटाले १ हजार ८५४ मत प्राप्त गरेको मुख्य निर्वाचन अधिकृत विदुर काफ्लेले जानकारी दिए ।

कर्णालीमा नेकपाका आचार्य र बिसी विजयी

राष्ट्रियसभा सदस्य पदका लागि विहिबार भएको निर्वाचनमा कर्णाली प्रदेशबाट नेपाल कम्युनिष्ट पार्टी (नेकपा) का उम्मेदवार मायाप्रसाद आचार्य र सुमित्रा बिसी विजयी भएका छन् ।

आचार्यले तीन हजार ६१८ मत प्राप्त गरेका छन् । उनका निकटतम् प्रतिद्वन्द्वी डिल्लीराम पाठकले एक हजार २६ मत प्राप्त गरेको निर्वाचन अधिकृत डा राजेन्द्रकुमार आचार्यले जानकारी दिए । त्यसैगरी बिसीले तीन हजार ६८४ मत प्राप्त गरेकी छिन् भने उनका निकटतम प्रतिद्वन्द्वी गणेशकुमारी बस्नेतले एक हजार २६ मत प्राप्त गरिन् ।

प्रदेश २ बाट मृगेन्द्रकुमार सिंह निर्वाचित

राष्ट्रियसभाको खुल्लातर्फको सदस्यमा प्रदेश नं २ बाट नेकपा र राष्ट्रिय जनता पार्टीका संयुक्त उम्मेदवार मृगेन्द्रकुमार सिंह निर्वाचित भएका छन् ।

निर्वाचन कार्यालयका अनुसार पाँच हजार ४०० मत प्राप्त गरी उनी निर्वाचित भएका हुन् । उनका निकटतम प्रतिद्वन्द्वी अनिरूद्धकुमार सिंहले चार हजार ५१२ मत प्राप्त गरेका छन् । सिंह सङ्घीय समाजवादी पार्टी र नेपाली काँग्रेसका संयुक्त उम्मेदवार हुन् । यस्तै राष्ट्रियसभाको महिला सदस्यमा प्रदेश नं २ बाट नेकपा र राष्ट्रिय जनता पार्टीका संयुक्त उम्मेदवार तुलसाकुमारी दाहाल निर्वाचित भइन् ।

निर्वाचन कार्यालयका अनुसार पाँच हजार २०८ मत प्राप्त गरी उनी निर्वाचित भएकी हुन् । उनका निकटतम प्रतिद्वन्द्वी नगिना यादवले चार हजार ७४० मत प्राप्त गरिन् । यादव नेपाली काँग्रेस र सङ्घीय समाजवादी पार्टीका संयुक्त उम्मेदवार हुन् ।

महिलामा प्रदेश ५ बाट घिमिरे निर्वाचित

राष्ट्रियसभा सदस्यको प्रदेश नं ५ को महिला सदस्यमा नेपाल कम्युनिष्ट पार्टी (नेकपा) की विमला घिमिरे निर्वाचित भइन् ।

उनी पाँच हजार ७२८ मत ल्याएर विजयी भएकी हुन् । उनका निकटतम प्रतिद्वन्द्वी नेपाली काँग्रेसका गिरिजादेवी न्यौपानेले दुई हजार १०० मत ल्याइन् ।

गण्डकी प्रदेशबाट श्रेष्ठ र न्यौपाने विजयी

राष्ट्रियसभाको अन्य समूह र महिला सदस्यमा क्रमशः गण्डकी प्रदेशबाट नेकपाका नारायणकाजी श्रेष्ठ र भगवती न्यौपाने निर्वाचित भएका छन् । नेकपा प्रवक्ता श्रेष्ठले तीन हजार ४६२ मत प्राप्त गरी विजयी भएका हुन् । उनका निकटतम प्रतिद्वन्द्वी नेपाली काँग्रेसका सूर्यप्रसाद रेग्मीले दुई हजार २४४ मत प्राप्त गरेका थिए ।

यसैगरी न्यौपाने तीन हजार ३६६ मत प्राप्त गरी विजयी भएकी हुन् भने उनका निकटतम प्रतिद्वन्द्वी काँग्रेसका विमला गौचनले दुई हजार ३४० मत प्राप्त गरिन् । अन्य समूहतर्फ राष्ट्रिय जनमोर्चाका शङ्कर बरालले १९८ मत प्राप्त गरेको निर्वाचन कार्यालयका प्रमुख महेन्द्र सुवेदीले जानकारी दिए ।

बागमतीमा बेदुराम

राष्ट्रियसभा निर्वाचनमा बागमती प्रदेशमा नेपाल कम्युनिस्ट पार्टी (नेकपा) का बेदुराम भुसाल र महिलामा गंगाकुमारी बेलबासे निर्वाचित भएका छन्। भुसाल ६ हजार ८ सय १० मत ल्याएर विजयी भए भने बेलबासेले ६ हजार ८ सय २८ मत ल्याएर विजयी भएकी छिन्। रासस