प्रजातन्त्रले कर्तव्य प्रती निष्ठावान बनाएको रामेछापका प्रमुखहरुको दाबी

फागुन ७ रामेछाप ।

बुधबार (आज) ७० औं प्रजातन्त्र दिवस रामेछापमा पनि विविध कार्यक्रम गरी मनाईएको छ । दिवसका अवसरमा सदरमुकाम मन्थलीमा प्रभातफेरी तथा एक सभाको आयोजना गरि दिवस मनाएको छ । सो एक सभामा बोल्दै जिल्ला समन्वय समिती रामेछापका प्रमुख प्रेम बहादुर खड्काले मेलमिलाप र सद्भाव कायम गरेर रामेछापको विकास निर्माणलाई अगाडी बढाउँन प्रजातन्त्र दिवसले सबैलाई थप ऊर्जा प्रदान गर्ने विश्वास गर्नुभएको छ ।


त्यस्तै मन्थली नगरपालिका प्रमुख रमेश कुमार बस्नेतले आर्थिक,सामाजिक रुपान्तरण जनताको चाहना भएकाले ती चाहना सम्बोधन गर्न प्रजातन्त्र दिवसले प्रेरित गर्ने दाबी गर्नुभयो ।
त्यस्तै रामेछापकी प्रमुख जिल्ला अधिकारी रुद्रादेवी शर्माले मुलुकमा प्रजातन्त्र स्थापना गर्नका लागि बलिदानी दिने शहीदहरुप्रति श्रदाञ्जाली गर्दै सबैको चाहाना राष्ट्रिय एकता, ऐकेवद्धता , सहिष्णुता ,भौगोलिक अखण्डता , दिगो शान्ति र सुशासन भएकाले यसलाई स्थापित गर्नका लागि सबैले आफ्नो कर्तव्य नभुली लाग्नुपर्नेमा जोड्दिनुभयो ।

कार्यक्रममा नेपाली कांग्रेस रामेछापका सचिव लेख बहादुर कार्की , नेपाल कम्युनिष्ट पार्टी नेकपा रामेछापका अध्यक्ष मैन कुमार मोक्तान , समाजवादी पार्टीका जिल्ला अध्यक्ष सोनाम ग्यापक लगाएतले आ–आफ्नो धारणा राख्नुभएको थियो ।

नेपाल रेड्क्रस सोसाइटी रामेछाप

त्यस्तै ७० औ प्रजातन्त्र दिवसको अवसरमा नेपाल रेड्क्रस सोसाइटी रामेछापले फलफुल वितरण गरेको छ । रामेछापको सदरमुकाम मन्थलीमा रहेका तामाकोशी, सामुदायिक, पिएसि लगायतका अस्पतालहरुमा विभिन्न रोगको उपचार गराइ रहेका बिरामीहरुलाई सहयोग पु¥याउने उद्देश्यले फलफुल वितरण गरिएको रेड्क्रसका मन्त्री प्रकाश श्रेष्ठले जनताभ्वासलाई जानकारी दिनुभयो । विभिन्न आपत विपदमा सहयोग गर्दै आएको संस्थाले जिल्ला समन्वय समितिका सभापति प्रेम बहादुर खड्का र प्रमुख जिल्ला अधिकारी रुद्र शर्माको उपस्थितिमा विरामीहरुलाई फलफुल दिएको हो । उनीहरुले बिरामीहरुको स्वस्थ्य लाभको कामना गरेका छन् । देशैभरि आज राष्ट्रिय प्रजातन्त्र दिवस, विभिन्न कार्यक्रम गरी मनाईदै छ ।

एक सय चार वर्षको जहानियाँ राणाशासन अन्त्य भइ देशमा प्रजातन्त्र बहाली भएको दिनको सम्झनामा फागुन ७ गते प्रजातन्त्र दिवस मनाइन्छ । प्रजातन्त्रकै जगमा लोकतन्त्र हुँदै देशमा अहिले सङ्घीय लोकतान्त्रिक गणतन्त्रात्मक शासन व्यवस्था स्थापना भएको छ ।

रामेछापका सबै स्थानीय तहमा कार्यक्रम

यता प्रजातन्त्रको अवसरमा रामेछापका आठ वटै स्थानीय तहहरुले औपचारीका कार्यक्रमको आयोजना गरि मनाएका छन् ।