चालू हिउँदे अधिवेशन आफ्नो जिम्मेवारी बहन गर्न असफल

चैत ,५ ,

रामेछाप । सामान्यतः संसदको हिउँदे अधिवेशनलाई विधेयक अधिवेशन भन्ने गरिन्छ । विधेयक अधिवेशन कानुन निर्माणमा केन्द्रित हुन्छ ।

तर, संघीय संसदको चालू अधिवेशन भने नाममात्रको विधेयक अधिवेशनमा सीमित भएको छ ।

कानुन निर्माणको जिम्मेवारी रहेको विधेयक अधिवेशनमा सांसदहरु आफ्नो मुख्य दायित्वमै असफल देखिएका छन् ।

जारी अधिवेशन समाप्त हुने समय नजिकिँदै गर्दा दुईओटा विधेयकमात्र पारित हुनुले हिउँदे अधिवेशन आफ्नो मुख्य जिम्मेवारी बहन गर्नबाट चुकेको देखिन्छ ।

त्यसो त संसदमा अहिले विधेयकको चाङ छ । ३३ ओटा विधेयक प्रक्रियामा, ६ ओटा दर्ता, एउटा सैद्धान्तिक छलफलमा र तीनओटा विधेयक समितिको प्रतिवेदन पेस भएको अवस्थामा छन् ।

प्रतिनिधिसभाबाट ८ ओटा विधेयक पारित भएपनि दुवै सदनबाट हालसम्म दुईओटा विधेयकमात्र पारित भएका छन् ।

यस्तै, जरुरी सार्वजनिक महत्वको प्रस्ताव, संकल्प र ध्यानाकर्षण प्रस्तावको अवस्था पनि उस्तै छ ।

विगतको परम्परालाई हेर्ने हो भने जारी अधिवेशन अब धेरै दिन चल्ने अवस्थामा छैन । किनभने, वैशाख २० गते सरकारले सदनमा नीति तथा कार्यक्रम प्रस्तुत गर्ने भएकाले त्यसअघि नै बजेट अधिवेशन आह्वान भइसक्नुपर्छ ।

गर्नुपर्ने काम धेरै भएपनि यो अधिवेशन बढीमा चैत तेस्रो सातासम्ममात्र चल्ने अवस्था छ ।

‘कोरोना’ संक्रमणको त्रासले सांसदहरुकै मागअनुसार बैठक ७ गतेसम्मका लागि रोकिएको छ । त्यसपछि पनि बैठक सहजरुपले सुचारु हुने सम्भावना कम छ ।

हाल प्रतिनिधिसभामा ३३ र राष्ट्रियसभामा १२ ओटा विधेयक विचाराधीन छन् ।

नागरिकता र संघीय निजामती सेवासम्बन्धी विधेयक अतिआवश्यक र तत्काल पारित गर्नुपर्ने भएपनि जारी अधिवेशनबाट पारित हुने अवस्था छैन ।

जारी अधिवेशन पुस ४ गते आह्वान भएपनि पाँच हप्ता सभामुख चयनमै बित्यो । त्यसपछि पनि संसद सहज ढंगले अगाडि बढ्न सकेन ।

प्रतिपक्ष दल नेपाली कांग्रेसले लगातार तीन दिन बैठक अवरुद्ध गर्‍यो भने विधेयक पारितका लागि गणपूरक संख्या नपुगेर चार बैठक स्थगित गर्नुपर्‍यो ।

अधिवेशनले गर्नुपर्ने थुप्रै काम बाँकी रहेकाले जारी अधिवेशन नाममात्रैको विधेयक अधिवेशनमा सीमित भएको छ ।