नेपालमा कोरोना संक्रमितको संख्या ५८ पुग्यो

वैशाख १७ । सरकारले परीक्षणको दायरा बढाएसँगै शंकास्पद थप चारजनामा ‘कोभिड–१९’ को संक्रमण भेटिएको छ ।

टेकुस्थित राष्ट्रिय प्रयोगशालामा परीक्षणका क्रममा बाराका दुई र पर्साका दुई पुरुषमा संक्रमण देखिएको स्वास्थ्य तथा जनसंख्या मन्त्रालयको इपिडिमियोलोजी तथा रोग नियन्त्रण महाशाखाका निर्देशक डा. वासुदेव पाण्डेले जानकारी दिए ।

उनकाअनुसार समुदायमा संक्रमण बढेको छैन । ती चारैजना भारतबाट नेपाल आएर ‘क्वारेन्टाइन’मा रहेका व्यक्ति हुन् ।

उनकाअनुसार संक्रमितमध्ये एकजना अस्पताल र अर्का तीनजना क्वारेन्टाइनमा रहेका छन् । संक्रमित पुरुष ३१, ४३, ४६ र ५० वर्षका रहेका छन् ।

बुधबार थप चारजनामा संक्रमण देखिएपछि संक्रमितको संख्या ५८ पुगेको छ भने पूर्णरुपमा स्वस्थ भएर १६ जना घर फर्किएका छन् ।

यो पनि पढनुस्
चितवनकी ६३ वर्षीया महिलाको तेस्रो रिपोर्ट पनि पोजेटिभ, नेपालमा ५७ जना पुग्यो कोरोना संक्रमितको संख्या, काेराेना भाइरस : विश्वभर ९ लाख ५२ हजारभन्दा बढी निको,३१ लाखभन्दा धेरै सङ्क्रमित, नेपालमै कोरोना भाइरस निर्मुल गर्ने औषधी तयार

अहिले ३९ जना संक्रमित अस्पतालको ‘आइसोलेसन’मा छन् ।

संक्रमित अन्यलाई अस्पताल लैजाने तयारी भइरहेको उनले जानकारी दिए ।

संक्रमितको नजिक रहेका ‘कन्ट्याक ट्रेसिङ’समेत भइरहेको जनाइएको छ । रासस