नेकपाको स्थायी कमिटी बैठक २५ गते बस्दै

वैशाख २१,

काठमाडौं । सत्तारुढ नेपाल कम्युनिष्ट पार्टी (नेकपा) ले स्थायी कमिटी बैठक डाकेको छ । वैशाख ८ मा ल्याइएका दुई विवादित अध्यादेशका कारण चर्किएको विवाद मथ्थर नभएको अवस्थामा नेकपाले वैशाख २५ गतेका लागि स्थायी कमिटी बैठक डाकेको हो। पार्टीमा कार्यकारी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल समूहले स्थायी कमिटी बैठक डाक्नुपर्ने आवाज उठाउँदै आएका थिए।

शनिबार बसेको सचिवालय बैठकले स्थायी कमिटी बैठक वैशाख २५ गतेका लागि डाकेको जानकारी पार्टीका प्रवक्ता नारायणकाजी श्रेष्ठले दिएका छन्। 

‘शनिबारको बैठकले वैशाख २५ का लागि स्थायी कमिटी बैठक बोलाउने निर्णय गरेको छ’, उनले भने, ‘त्यसअगाडि वैशाख २४ गते सचिवालय बैठक बस्‍ने भएको छ।’

नेकपाको विवाद चर्किएपछि दुई सातायता निरन्तर संवाद चलिरहेको थियो। खुमलाटर, कोटेश्वर र बालुवाटारमा लगातार गुटगत सम्वाद र नेताहरुबीच वार्ता भएको थियो।

यस्तो अवस्था प्रधानमन्त्री ओली स्थायी कमिटी बोलाउने पक्षमा थिएनन्। गत वैशाख १० गते दाहाल-नेपाल समूहका २० नेताले तत्काल स्थायी कमिटी बैठक बोलाउन नेतृत्वलाई दबाब दिएका थिए।