दोलखाको किर्नेमा ६ सय ८० सवारी साधन निर्मलीकरण (भिडियो सहित)

बैशाख २८

रामेछाप । कोरोना कहर बढिरहेको बेला तामाकोसी गाउँपालिका र तारादल गण किर्ने दोलखाले सवारी साधनहरुको सेनिटाइजिङ्ग कार्य थालनी गरेको छ । गत बैशाख २५ गतेबाट थालनी गरिएको उक्त रेनिटाइजिङ्ग कार्यले शनिबार सम्म साना ठूला गरी ६ सय ८० सवारी साधनहरुको सेनिटाइजिङ्ग गरिएको तारादल गणका जमदार मोहनबहादुर शाहीले जनता भ्वाइसलाई जानकारी दिएका छन् । हिमाल पावर लिमिटेडले निर्माण गरेको हेलिप्याडमा बनाइएको अस्थायी सेनिटाइजिङ्ग कक्षमा खिम्ती, मन्थली तर्फबाट आउने एम्बुलेन्स बाहेकका जुनसुकै सावरी साधनहरुलाई उक्त स्थानमा २० मिनेट सेनिटाइजिङ्ग गरी छोडिने गरिएको छ ।

तामाकोसी गाउँपालिका र नेपाली सेनाले निर्मण गरेको सवारी सेनिटाइजिङ्ग कक्ष

तराईबाट आएका जुनसुकै सवारी साधनहरुका चालक तथा सहचालकहरुको ज्वरो समेत नाप्ने गरिएको जमदार शाहीले जानकारी दिएका छन् । शनिबार जनता भ्वाइसको टिम रिपोर्टिङ्गको लागि उक्त स्थानमा पुग्दा केही मोटर साइकल र ट्रकहरुलाई सेनिटाइजिङ्ग गरिँदै थियो । चर्कोघाममा समेत सवारी साधनका चालकहरु सो कार्यको धैर्यतापूर्वक प्रतीक्षा गरिरहेका देखिन्थे । ‘नेपाल सरकारले नै कोरोना भाइरस (कोभिड १९) बाट बच्नको लागि गरेको यो सरहानीय कार्यले केही समय पर्खिनुपर्ने भएता पनि आफ्नै सुरक्षाको लागि भएकोले आफूलाई केही झञ्झट छैन ।’ सेनिटाइजिङ्ग कक्षमा आफ्नो पालो कुरिरहेका मन्थली १३ का नरबहादुर योगीले प्रतिक्रिया दिए ।


२४ सै घण्टा सेवामा रहेर कोरोना भइरसको नियन्त्रणका लागि खटिरहँदा ड्युटी थपिए पनि जनसेवा गर्न पाउँदा खुशी लागेको तारादल गणका जमदार मोहनबहादुर शाहीले प्रक्रिया दिएका छन् । तामाकोसी गाउँपालिका दोलखा र तारादल गणको संयुक्त क्रियाशीलतामा थालिएको उक्त सेनिटाइजिङ्ग कार्यजस्तो रामेछाप जिल्लामा कुनै पनि स्थानमा छैन । सोडियम क्लोरिन नामक केमिकल छर्किएर आउने सवारी साधनलाई निर्मलीकरण गर्ने गरिएको तामाकोसी गाउँपालिकाका स्वास्थ्य शाखाका कर्मचारी अरुण मिश्रले जानकारी दिएका छन् । मन्थली तर्फबाट आउने सवारी साधनलाई लक्षित गरी निर्मलीकरण गर्ने गरिएको भएता पनि देविटार तर्फबाट आउने कुनै पनि सवारी साधनहरुलाई उक्त निर्मलीकरणको कार्य नगरिएको जमदार शाहीले जानकारी दिएका छन् ।