७५ प्रतिशत अनुदानमा कृषकलाई बोयर बोका (भिडियो सहित)

असार २३।रामेछाप,
लिखु तामाकोसी गाउँपालिका वडा नं. २ वडा कार्यालय सैपुले कृषकहरुलाई उन्नत जातका बोका वितरण गरेको छ । वडा भित्र व्यक्तिगत वा समूहगत रुपमा बाख्रापालन गर्दै आएका कृषकहरुको व्यवसाय वृद्धि र स्तरोन्नतिका लागि यस प्रकारको कार्य गरिएको उक्त वडाका वडाध्यक्ष पदमबहादुर तामाङले जानकारी दिएका छन् ।
गत शनिबार वडा कार्यालय नजिकै रहेको सैपु बजारमा वडाभित्रका ९ वटा व्यक्तिगत तथा समूहिक कृषि फर्महरुलाई बोयर जातका बोका वितरण गरिएको हो । आर्थिक वर्ष २०७६–०७७ को वार्षिक स्वीकृत कार्यक्रममा समावेश भएको उक्त कार्यक्रममा स्थानीय स्तरबाट खोजिएका बोयर जातका बोकाहरु गोला प्रथाबाट वितरण गरिएको हो ।

स्थानीय स्वरोजगार कृषक समूह पहरे, लालिगुराँस कृषक समूह ओख्रेनी, चम्पाकाली कृषक समूह माझाघर, उद्यमशील तरकारी उत्पादन समूह टार, फलफूल खेती विस्तार कृषक समूह सुनुवार गाउँ, सुन्दरबस्ती फलफूल तथा तरकारी कृषक समूह, कमलबहादुर बस्नेत ढाँडे, तारा राउत पोक र प्रेमप्रसाद पौडेल सैपु गरी ९ कृषक तथा कृषक समूहहरुलाई उन्नत जातका बोयर बोका वितरण गरिएको हो ।
आधुनिक जातका बाख्रा उत्पादन गर्ने उद्देश्यले आफ्ना वडाका कृषकहरुलाई बोका वितरण गरिएको वडाध्यक्ष तामाङले जनताभ्वाईसलाई बताएका छन् ।

वडास्तरमा नै आफूहरुलाई उन्नत जानको बोका दिएर सहयोग गरेको सुन्दरबस्ती कृषक समूहकी अध्यक्ष अप्सरा मुग्रातीले बताइन् । आफ्ना १६ घरधुरी सम्मिलित कृषकहरुलाई प्राप्त बोका सदुपयोग गरिने उनले बताएकी छिन् ।
त्यस्तै सैपुकै प्रेमप्रसाद पौडेलले आफ्नो उद्यमशील कृषक समूहमा भएका ८० घरधुरीहरुमा पालिएका बाख्राहरुका लागि सबैभन्दा ठूलो बोका प्राप्त गरेका थिए । वडा कार्यालले दिएको यो सहयोग आफूलाई राम्रो लागेको प्रतिक्रिया दिए ।