दूधमा अनुदान पाउँदा कृषकहरु फुरुङ्ग

असार २७ । जनता भ्वाइस संवाददाता, रामेछाप
मन्थली नगरपालिकाले दूग्ध उत्पादक कृषकहरुलाई अनुदान वितरण गरेको छ । मन्थली नगरपालिकाले आज कृषकहरुको लाई नगरपालिका परिसरमा नै बोलाई कोरोना भाइरसको कारण सामाजिक दूरी कायम गर्दै अनुदान वितरण गरेको हो ।
मन्थली नगरपालिका भित्र व्यवसायिक तथा व्यक्तिगत रुपमा गाई भैंसीको दूध रामेछाप जिल्लामा रहेका २ वटा दूग्ध डेरीमा वितरण गर्ने गरेको तथ्यलाई आधार मान्दै नगरपालिकाले प्रतिलिटर १ देखि २ रुपैयाँ सम्म अनुदान दिएको हो ।
मन्थली नगरपालिकाको वार्षिक स्वीकृत कार्यक्रम मार्फत चालु आर्थिक वर्षमा कृषकहरु लक्षित अनुदान कार्यक्रम मार्फत यो अनुदान दिइएको पशु शाखाका प्रमुख मुकुन्दकुमार खड्काले जनता भ्वाइसलाई जानकारी दिएका हुन् ।


चालु आर्थिक वर्षको पहिलो चौमासिक अर्थात् कार्तिक महिना सम्म २ लाख ३० हजार १ सय ६२ रुपैयाँ नगरपालिकाले कृषकहरुका लागि वितरण गरिसकेको छ । त्यस्तै दोस्रो चौमासिक मंसीर, पौष, माघ र फागुन महिनामा दूध उत्पादन गरी डेरीमा बेच्न ल्याउने कृषकहरुलाई प्रतिलिटर १ रुपैयाँ र कोभिड १९ को कारणले समस्यामा परेर पनि दूध बेच्ने कृषकहरुलाई विशेष परिस्थिति सिर्जना भएको कारण गत असार ६ गतेको नगरपालिकाको निर्णयानुसार २ रुपैयाँ प्रतिलिटर अनुदान दिइएको खड्काले जानकारी दिएका छन् ।


यसरी कृषकहरुले डेरीमा दैनिक उत्पादन गरी बेच्न ल्याएको दूधको आधारले हिसाब गरी अनुदान रकम ७ रुपैयाँ देखि ५२ हजार रुपैयाँ सम्म वितरण गरिएको थियो । ७ लिटर अर्थात् ७ रुपैयाँको अनुदान पाउने कृषक सो रकम लिन आएका थिएनन् भने सबै भन्दा बढी ५२ हजार लिटर दूध उत्पादन गर्ने आनन्द पशुपालन तथा अर्गानिक कृषि फर्मका संचालक कृषक केशर पौडेल भने आफूले अनुदानमा पाएको रकमलाई घाँस उत्पादनको क्षेत्रमा लागनी गर्ने बताउँछन् । जनता भ्वाइससँगको कुराकानीमा पौडेल भन्छन्, ‘ंयो अनुदान प्रति मन्थली नगरपालिकालाई निकै आभार व्यक्त गर्दछु । यस्तो खालको हौसललाले कृषकहरुलाई यस कर्मप्रति अझ खारिन मदत गर्न सक्छ ।’