सुनापतिमा धारिलो हतियार प्रहारबाट एक किशोरी गम्भीर घाइते, पुरुष मृत फेला

असार २७

रामेछाप । सुनापति गाउँपालिका ४ बेथानमा एक किशोरी धारिलो हतियार प्रहारबाट गम्भिर घाइते भएकी छिन् । घाईते हुनेमा बेथानकी स्थानीय २३ वर्षीय अरुणा राय रहेकी छन् । उनलाई धारिलो हतियार प्रहारबाट गम्भिर चोट लागेको छ । शुक्रबार साँझ करिब ५ बजेको समयमा उनीमाथि आक्रमण भएको बताइएको छ । तर उनीमाथि कसले र किन आक्रमण गर्यो भन्ने खुलेको छैन् । उनलाई हत्या गर्ने उद्श्यले हतियार प्रहार भएको पाइएको छ ।

उनलाई उद्धार गरि उपचारको लागि तत्काल धुलिखेल अस्पताल पठाईएको र अहिले उनको शल्यक्रिया गर्ने तयारी भैरहेको जिल्ला प्रहरी कार्यालय रामेछापका प्रहरी निरीक्षक तथा प्रवक्ता टेकेन्द्र शर्मा पौडेलले जनता भ्वाइसलाई जानकारी दिए । उनको अवस्था मध्यम रहेको उनले बताए ।

त्यस्तै रायलाई घाईते अवस्थामा भेटिएको ५० मिटरको दुरीमा एक पुरुष रुखमा झुण्डिएको अवस्थामा मृत फेला परेका छन् । मृत भेटिनेमा रुकुम पश्चिम कुसिकोट नगरपालिका घर भै सुनापति गाउँपालिकाको डहु विधुत प्राधिकरणमा कार्यारत अन्दाजी २७ वर्षीय प्रमोद कुमार ओली रहेका छन् । उनको मृत्यु बारे ओलीको परिवारलाई जानकारी गराएको र परिवार रुकुमबाट रामेछापको लागि हिडिसकेकाले उनीहरु याँहा आएपछि घटनाको बारेमा विस्तृत जानकारी आउने निरीक्षक पौडेलले बताए ।file photo