सुत्केरी हुन आउने महिलाको संख्या बढ्न थालेपछि सिन्धुली अस्पताल विस्तार

सम्झना श्रेष्ठ, श्रावण १ सिन्धुलीमाढि ।
पछिल्लो समय सिन्धुली अस्पतालमा सुत्केरी हुन आउने महिलाको संख्यामा वृद्धि भएको छ । अस्पतालमा सुत्केरी हुन आउने महिलाहरुलाई राख्नका लागि प्रसुती वार्ड निर्माण भएको छ । ९ वटा वेड अटाउने गरि निर्माण गरिएको भवनमा हाल ७ वटा वेड राखिएको छ । दैनिक ६÷७ जनासम्म महिलाहरु सुत्केरी हुन आउने गरेका छन् । अस्पतालमा वेडको अभाव भएपछि नयाँ भवन निर्माण गरिएको अस्पतालले जनाएको छ । अप्रेशन गरिने सुत्केरी महिलाहरुलाई राख्नका लागि उक्त भवन प्रयोग गर्ने लक्ष्यका साथ निर्माण गरिएको हो । स्वास्थ्य मन्त्रालयको १३ लाख रुपैँया, उर्मिला थापाबाट प्राप्त रकम २ लाख, सामुदायिक वन उपभोक्ता महासंघ जिल्ला महासंघबाट प्राप्त १ लाख र विजय कुवरबाट प्राप्त २५ हजार तथा कर्मचारी मिलन केन्द्रबाट १५ हजार रुपैयाँ रकमबाट भवन निर्माण गरिएको सिन्धुली अस्पतालले जनाएको छ ।

भवन सम्पन्न गर्दा १६ लाख ३८ हजार रुपैंया भ्याट सहित लागत लागेको सिन्धुली अस्पताल विकास समितिका अध्यक्ष प्रलाद पोखरेलले बताउनुभयो । नवनिर्मित भवनबाट सुत्केरी महिलाले भोलीदेखि सेवा पाउने छन् । उक्त भवनका लागि आवश्यक वेड तथा अन्य सामग्री, उपकरणहरु गरि १० लाख रुपैयाँ बराबरको सामान कमलामाई नगरपालिकाले सहयोग गरेको जनाइएको छ । आज कमलामाई नगरपालिकाका प्रमुख खड्ग खत्रीले भवनको उद्घाटन गर्नुभएको हो ।