कृषकको मकै जंगली जनावरले नष्ट, काम गर्ने कालु मकैखाने भालु भनेजस्तै भएको कृषकको गुनासो

साउन ११ । जनताभ्वाइस संवाददाता, रामेछाप

कोरोना भाइरसको कारणले विभिन्न समस्यासँग जुधिरेहका दोलखा जिल्लाका कृषकहर यतिबेला बाँदर, दुम्सी र बँदेलको आतङ्कबाट गुज्रिरहेका छन् । दोलखा जिल्लाका कृषकले लगाएको मकै बारीमा बाँदर, दुम्सी र बँदेलले सखाप पार्न थालेपछि दोलखा जिल्लाका कृषकहरु मर्कामा परेका छन् ।

दिउँसो त ठिकै हो, रुँगालु राखेरै भएपनि मकैबारी जोगाउन सकिन्थ्यो तर रातीको समयमा दुम्सी र बँदेलले मकैबालीमा क्षति पुर्याएको कृषकहरुले बताएका छन् । बाँदर, दुम्सी र बँदेलले मकैबाली नष्ट गरिदिएपछि वर्षभरि खाने अन्न बालीमा आफूलाई घाटा लागेको तामाकोसी गाउँपालिका मालुका कृषक अर्जुन पोखरेलले बताएका छन् । मालुमा रातोबाँदरले कृषकहरुलाई सास्ती दिएको छ ।

बिगुका कृषक ढालबहादुर तामाङ आफूहरुलाई दिउँसोका समयमा बाँदर र रातीको समयमा दुम्सी र बँदेलले दुःख दिएको बताउँछन् । उनी भन्छन्, ‘दिउँसो त जसोतसो मकै जोगाउन सकिन्थ्यो, तर राती सुत्न समेत पाइँदैन । रातभरी मकैबारीमा गोठालो बसेर मकै जोगाइरहेका छौं ।

त्यति हुँदा पनि कतै न कतैबाट आएर दुम्सी र बँदेलले कमै खाइदिन्छ । जोगाउनै मुस्किल परिसक्यो ।’ दुम्सी रातमा मात्र आउने भएकाले रातमा दुम्सी धपाउन आगो बाल्ने थाल र टिन थर्काउने, सिटी बजाउने जस्ता काम कृषकहरुले गरिरहेका छन् ।

किसानहरु रातभर बारीमै जाग्राम बस्नु परेको अवस्थाले उनीहरुलाई हैरानी भएको बताएका छन् । गाउँ घरका अधिकांश मानिस जमिन बाँझो राखेर शहर पसेको तथा गाउँमै बसेकाहरुले समेत खेतीपाती नगरेका कारण पछिल्लो समय जंगली जनावरको बिगबिगी बढेको हो ।

बाँदर दुम्सी मृग लगायतका जंगली जनावरले बालीनालीमा क्षति गरेपनि किसानहरुले अहिलेसम्म यस बारेमा कुनैपनि क्षतिपूर्ति पाउन सकेका छैनन् । यसै बीच भीमेश्वर नगरपालिकाले केहीदिन अघि बाँदर आतङ्क नियन्त्रण गर्न भन्दै किसानहरुलाई बाँदर धपाउने यन्त्र समेत वितरण गरेको थियो ।

नगरपालिका ७५ हजारमा खरिद गरेको ३० थान बादर धपाउने उपकरण विभिन्न भूगोल किसानहरुलाई वितरण गरेको हो । सो उपकरणले बाँदर खेतबारीमा आउँदा ठूलो स्वरले पड्काएर बाँदर धपाउने कामका लागि प्रभावकारी हुनसक्ने नगरपालिका स्रोतको अनुमान रहेको छ ।