भिरबाट खसेको ढुङ्गाले किच्दा एक जनाको मृत्यु

साउन १५, दोलखा ।
यस वर्ष पनि बाढी पहिरोले गर्दा देशका धेरै स्थानमा जनधनको ठूलो क्षति भइरहेको छ । त्यस्तै दोलखाको उत्तरी ब्यापारिक केन्द्र सिंगटी बजारमा भीरबाट खसेको ढुंगाले घर थिच्दा घरमा बसिरहेकी एक महिलाको बुधबार मृत्यु भएको छ ।


जिल्लाको विगु गाउँपालिका ४ स्थित सिंगटी बजारमा घरमा बसिरहेकी ३५ वर्षिया रेणु थामीको भीरबाट आएको ढुंगाले घर थिच्दा मृत्यु भएको हो । इलाका प्रहरी कार्यालय सिंगटीका अनुसार मंगलबार बिहान १० बजेतिर बजार क्षेत्र भन्दा झण्डै ५ सय मिटर माथिको भीरबाट आएको ठुलो ढुंगाले सिंगटी बजारको खोलीखेममा रहेको जस्ताले छाएको घर थिचेको थियो ।

घर थिच्दा भित्र रहेकी थामीलाई सोही घरको पर्खालले थिचेर गम्भीर घाइते भएपछि स्थानीय स्वास्थ्य संस्थाले थप उपचारका लागि राजधानीको न्युरो अस्पताल रिफर गरिएको थियो ।


ईलाका प्रहरी कार्यालय सिंगटीका प्रमुख प्रहरी निरिक्षक सुन्जीत तामाङका अनुसार गम्भीर घाइते थामीको अस्पताल लैजादै गर्दा बाटोमानै मृत्यु भएको थियो । उनको शब चरिकोटस्थित प्राथमिक स्वास्थ्य केन्द्रमा राखिएको छ । मृत महिला कालिञ्चोक गाउँपालिका २ बावरेका वडा सदस्य विकास थामीकी श्रीमती रहेको प्रहरी निरिक्षक तामाङले जानकारी दिए ।