आफू कोरोना भाइरस संक्रमणको सिकार भएपछि वीरगंज महानगरपालिकाका मेयरले दिए यस्तो मर्मस्पर्शी सन्देश

साउन १६, जनता भ्वाइस संवाददाता ।

वीरगंज महानगरपालिकाका प्रमुख (मेयर) विजय सरावगीलाई कोरोना संक्रमण पुष्टि भएको छ । सामाजिक संजाल फेसबुक मार्फत् आफूलाई कोरोना संक्रमण पुष्टि भएको सरावगीले जानकारी दिएका हुन् । आफूलाई कोरोना संक्रमण पुष्टि भएपछि सरावगीले आम वीरगंजबासीलाई यस्तो मर्मस्पर्शी सन्देश दिएका हुन् । आदरणीय दाजु भाई तथा दिदी बहिनीहरु । विगत पाँच महिनादेखि कोरोना भाइरसको संक्रमणबाट वीरगंजवासीलाई बचाउन मैले हरसम्भव प्रयासहरु गरेँ ।

संघीय र प्रदेश सरकारको दायित्व अन्तरगत रहेको क्वारेन्टिन, आइसोलेशन सेन्टर, कोभिड अस्पतालको व्यवस्थापन र संचालनको जिम्मेवारी ती निकायहरुले नलिएपछि मैले नै लिएर नागरिकको जीवन रक्षाको लागि अथक प्रयत्न गरेँ । वीरगंजलाई बचाउन पिसिआर मेशिन, परीक्षणकालागि आवश्यक पर्ने किटहरुको समेत व्यवस्थापन गरेँ । क्वारेन्टिन, आइसोलेशन र कोभिड अस्पतालमा रहेका संक्रमितहरु सहित अस्पतालमा कार्यरत डाक्टर, स्वास्थ्यकर्मी र सफाईकर्मीको खाना र बस्नको व्यवस्था मिलाएँ ।

वीरगंजलाई ग्रिन जोन बनाउने उदेश्यका साथ एकघर एक परीक्षणको अभियान संचालन गर्ने भनिएता पनि त्यसको कार्यान्वयन समयमा हुन नसक्दा वीरगंजमा कोरोना संक्रमण समुदाय स्तरमा फैलिसकेको रहेछ । तपाईहरुको सेवामा अनवरत रुपमा लाग्दा लाग्दै म स्वयं कोरोनाको संक्रमणको चपेटामा परेको छु । म अहिले उपचारार्थ छु, मेरो स्वास्थ्य अवस्था सामान्य छ । मैले छिट्टै नै कोरोनालाई जित्ने छु । पछिल्लो पटक कोरोना संक्रमणबाट वीरगंज आक्रान्त बनेको छ । वीरगंजलाई बचाउन अग्रमोर्चामा रहनु हुने स्वास्थ्कर्मी, महानगरपालिकाका जनप्रतिनिधि, कर्मचारी, नागरिक समाज, संचारकर्मी, विभिन्न राजनीतिक दल, स्थानीय प्रशासन र सुरक्षाकर्मीको प्रयासलाई धन्यवाद दिन चाहन्छु ।

अब स्थानीय स्तरबाट मात्र कोरोना नियन्त्रण गर्ने अवस्था देखिँदैन । तसर्थ वीरगंजबासी दाजुभाइ, दिदी बहिनीको जीवन रक्षाको लागि संघीय र प्रदेश सरकारले तत्काल ठोस योजनाका साथ अधि बढ्न आग्रह गर्दछु । साथै कोरोना संक्रमणको यो घडीमा आफूलाई संयमित राख्न र नेपाल सरकारले तोकेको मापदण्ड पालना गर्न सम्पूर्ण महानगरबासी दाजुभाइ, दिदीबहिनीमा अपिल गर्दछु । कोभिड १९ का विरुद्ध महानगरपालिकाले लिएका नीति प्रति साथ सहयोग दिनुहुने सम्पूर्ण महानुभाव प्रति हार्दिक नमन् । मैले कोरोना संक्रमणको लडाईँ जितेर पुनः तपाईको सेवामा आउने प्रतिवद्धता जाहेर गर्दछु ।