उत्कृष्ट आदिवासी जनजाती पत्रकारीता वर्ष पुरस्कार -२०७७ द्वारा घिसिङ सम्मानित

श्रेष्ठ द्वारा ५० हजारको पुरस्कार कोष घोषणा

साउन २७, रामेछाप ।

आदिवासी जनजाती पत्रकार महासंघ (फोनिज) रामेछापले उत्कृष्ट आदिवासी जनजाती पत्रकारीता वर्ष पुरस्कार -२०७७ वितरण गरेको छ । फोनिजले यो वर्षको उत्कृष्ट आदिवासी जनजाती पत्रकारीता वर्ष पुरस्कार -२०७७ द्वारा रामेछापका क्रियाशिल पत्रकार युनिक विफा घिसिङलाई सम्मानित गरेको हो । आदिवासी जनजाती पत्रकार महासंघ (फोनिज) को २१ औँ स्थापना दिवसको अवसर पारेर फोनिज रामेछापले सो कार्यक्रम गरेको हो ।

उत्कृष्ट आदिवासी जनजाती पत्रकारीता वर्ष पुरस्कार -२०७६ द्वारा रामेछापका अग्रज पत्रकार सुमित श्रेष्ठलाई सम्मान गरि सुरु गरेको सो पुरस्कारलाई निरन्तरता दिँदै फोनिज रामेछापले यो वर्ष घिसिङलाई सम्मान गरेको हो । उत्कृष्ट आदिवासी जनजाती पत्रकार पुरस्कारमा फोनिजले रू ५ हजार नगद र प्रमाणपत्र प्रदान गर्दै आएको छ ।

आदिवासी जनजाती पत्रकार महासंघ (फोनिज) का केन्द्रिय पार्षद समेत रहेका श्रेष्ठले यस वर्षको पुरस्कार राशी सहयोग गरेका थिए भने आदिवासी जनजाती पत्रकार महासंघ (फोनिज) रामेछापका लागि ५० हजारको पुरस्कार कोष स्थापना आफू स्वयम् ले गरिदिने समेत घोषणा गरेका छन् । सो रकमको व्याजले अर्को वर्ष देखि पुरस्कार वितरण गर्न सहज हुने उनको भनाई थियो ।

पत्रकारहरूले खोज पत्रकारिता गरि जिल्लाको समग्र विकासमा योगदान दिन   विशेष अतिथि तथा रामेछाप नगरपालिकाका उप-प्रमुख सृजना खड्काले  सुझाव दिएकी थिईन् ।

आदिवासी जनजाती पत्रकार महासंघ (फोनिज) रामेछापले प्रदेश भरिमै उत्कृष्ट कार्य गरेको  आदिवासी जनजाती पत्रकार महासंघ (फोनिज) का बागमति प्रदेश उपाध्यक्षले जिकिर गरे ।

यता प्रमुख अतिथि तथा रामेछाप नगरपालिकाका प्रमुख नरबहादुर थापाले बैधानिक बाटोबाट आउने सम्पुर्ण पत्रकारका छाता संगठनहरूलाई नगरपालिकाले उचित सम्बोधन गर्ने बताएका थिए ।

बिहान ८ बजे सुरु गरिएको कार्यक्रम जिल्ला प्रशासनको मास्क वितरण कार्यक्रमको भिडभाडका कारण निर्धारित समय सिमा भन्दा ढिला सुरु भएको थियो ।

उत्कृष्ट आदिवासी जनजाती पत्रकारीता वर्षपुरस्कार -२०७७ तथा चियापान कार्यक्रमको अध्यक्षता आदिवासी जनजाती पत्रकार महासंघ (फोनिज) रामेछापका अध्यक्ष नवराज श्रेष्ठले गरेका थिए ।