नगरपालिका सिल भएपनि उच्च सुरक्षाका साथ आकस्मिक कार्य रोकिँदैन : नगरप्रमुख बस्नेत

साउन ३०, जनता भ्वाइस संवाददाता, रामेछप

मन्थली नगरपालिका अन्तत बिहिबार सिल भएको छ । कोरोना भाइरस कोभिड १९ का संक्रमणका कारण मन्थली नगरपालिकाका कर्मचारीहरुमा नै संक्रमण पोजेटिभ देखिएपछि नगरपालिकालाई जिल्ला प्रशासन कार्यालय, रामेछापले साउन २९ गतेको निर्णयानुसार सिल गरिएको हो ।

नगरपालिकाका संक्रमित कर्मचारीको सम्पर्कमा आएका व्यक्तिहरुलाई कन्ट्रयाक ट्रेसिङ गरी पहिचान गर्ने कार्य यथाशिघ्र सुरु गर्न लागिएको जिल्ला अस्पताल रामेछापका कोरोना फोकल पर्सन डाक्टर आनन्दप्रसाद आचार्यलाई उघ्रित गर्दै नगरप्रमुख रमेशकुमार बस्नेतले जानकारी दिएका छन् । नगरपालिकाका अन्य कर्मचारीहरुको स्वाव संकलन कार्यलाई आइतबार थालनी गरिने मन्थली नगरपालिकाले जनाएको छ । ‘एकजना कर्मचारीलाई संक्रमण पोजेटिभ देखिएसँगै अन्य कर्मचारीहरुलाई कहिलेबाट पिसिआर टेस्ट राउनुहुन्छ ?’ भन्ने जनता भ्वाइसको जिज्ञासामा नगरप्रमुख बस्नेत भन्छन्, ‘केही दिन अघि उपप्रमुख सहित् केही कर्मचारीहरुको टेस्ट पछि रिपोर्ट समेत नेगेटिभ आइसकेको छ । अब बाँकी कर्मचारीहरुको स्वाब संकलन कार्य आइतबार हुनेछ ।

पहिलो टोलीमा नगरपालिकाका कर्मचारीहरुको स्वाब संकलन हुनेछ भने त्यसपछि संक्रमित कर्मचारीसँग सम्पर्कमा आएका व्यक्तिहरुको कन्ट्रयाक ट्रेसिङ मार्फत् पहिचान गर्ने हुनेछ । त्यस कार्याका लागि मन्थली नगरपालिका तयारी गर्दै छ ।’ नगरपालिकाले संक्रमित कर्मचारीसँग ‘क्लोज कन्ट्याक्ट्’ भएका व्यक्तिहरुलाई रामेछाप अस्पतालका डाक्टर तथा कोरोना सम्बन्धी जिल्ला फोकल पर्सन आनन्दप्रसाद आचार्य मार्फत कन्ट्रयाक ट्रेसिङ भइरहेको बस्नेतले जानकारी दिएका छन् ।

नगरपालिका सिल भएपनि आकस्मिक सेवाको विषय नरोकिने नगरप्रमुख बस्नेत बताउँछन् । ‘फिल्डमा भइरहेका विकास निर्माणका कार्यहरु उपलब्ध जनशक्तिको आधारले रोकिँदैन । जो जहाँ हुनुहुन्छ, उहाँहरुलाई त्यहीँ राखेर काम लगाइन्छ । नयाँ जनशक्ति थपिने हुँदैन । कार्यालयले नागरिकहरुका आकस्मिक सेवाका कार्यहरु उच्च सुरक्षाका साथ १–२ जना कर्मचारी मार्फत् सम्पादन हुन सक्छ ।’ बस्नेतले भने ।