कार्यदल अनुमोदन गर्न सचिवालय बैठक एक महिनापछि

भदौ १, काठमाण्डौ ।

सत्तारुढ दल नेपाल कम्युनिस्ट पार्टी (नेकपा)को सचिवालय बैठक एक महिनापछि आज बालुवाटारमा १० बजे सुरू भएको नेकपा स्रोतले जनाएको छ। 

पार्टीभित्रको विवाद समाधानका लागि अध्यक्षद्वय केपी ओली र पुष्पकमल दाहाल प्रचण्डले गठन गरेको कार्यदल अनुमोदन गर्न सचिवालय बैठक बोलाइएको हो। 

प्रधानमन्त्री केपी ओलीका प्रेस सल्लाहकार सूर्य थापाले सोमबार बिहान ट्विट गर्दै साउन ४ देखि हुन नसकेको पार्टी सचिवालयको बैठक आज ९: ३० बजे बालुवाटारमा हुने तय भएको जानकारी दिएका छन्।

नेकपाभित्रको विवाद समाधान गर्न भन्दै महासचिव विष्णु पौडेलको संयोजकत्वमा गत शुक्रबार ६ सदस्यीय कार्यदल गठन गरिएको थियो।

पार्टी कमिटीमा छलफलनै नगरी कार्यदल बनाइएको भन्दै वरिष्ठ नेता झलनाथ खनाल, माधवकुमार नेपाल, नारायणकाजी श्रेष्ठलगायतले असन्तुष्टि जनाएपछि सचिवालयकाे बैठक बोलाइएको हो।

यसअघि ३ साउनमा बसेको सचिवालय बैठकमा प्रधानमन्त्रीसमेत रहेका पार्टी अध्यक्ष ओलीले मंसिरमै महाधिवेशन गर्ने प्रस्ताव गरेका थिए। त्यसप्रति पार्टीका शीर्ष नेताहरुले असन्तुष्टि जनाउँदै आएका छन्।

आजको सचिवालय बैठकले अध्यक्षद्वयले गठन गरेको कार्यदललाई अनुमोदन गर्ने नेकपा स्रोतले जनाएको छ।