मल बेच्दा कृषक ठग्ने नियन्त्रणमा, कृषक जागरण सहकारीको मल बिक्री केन्द्र सिल

भदौ ०२ । जनता भ्वाइस संवाददाता, रामेछाप ।
कृषक जागरण कृषि सहकारी संस्था ओख्रेनी, रामेछाप ६ को विक्री केन्द्र मन्थलीमा भएको मलमा कृषक ठगीका अभियुक्त पदमबहादुर लामालाई अनुसन्धानका लागि प्रहरीले नियन्त्रणमा लिएको छ ।


आज बिहान कृषक जागरण कृषि सहकारी संस्थाका व्यवस्थापक तथा मलका वितरक लामाले एमोनियम सल्फेट नामक मलको मूल्य लिएर युरिया मल बेचेको थिए । साल्ट टे«डिङ् कर्पोरेशन बनेपा अन्र्तगत वीरगंजबाट ल्याइएको उक्त युरिया मलको वीरगंज मूल्य ८ सय ४६ पर्ने भएको भएता पनि मन्थलीमा ल्याएर लामाले १ सय ६६ बोरा १ हजार ८ सयका दरले बेचेका थिए । कृषकको नाममा काटिएको बीलमा एमोनियम सल्फेट लेखेरै दिएको भएपनि मल भने युरिया भिडाइएको कृषकहरुले गुनासो गरेका थिए ।

लामालाई प्रहरी नियन्त्रणमा लिइ भ्यानमा हालिँदै


साथै कृषकहरुले आफूहरुले मल लिने बेलामा पैसा तिरेको बील पाएको र मल लिने बेला सो बिल फेरि खिचेर आफूहरुलाई बिल नै नदिएको गुनासो गरेका छन् ।


मन्थली स्थित सो सहकारीको विक्रीकेन्द्रमा जिल्ला प्रशासन र जिल्ला प्रहरी तथा पत्रकारहरुको रोहवरमा सिल गरिएको छ भने उक्त विक्री केन्द्रका संचालक तथा सहकारीका व्यवस्थापक पदमबहादुर लामालाई प्रहरीले अनुसन्धानका लागि नियन्त्रणमा लिएको छ ।

लामालाई ठगी र कालोबजारी अन्तर्गत कारवाही हुने सहायक प्रमुख जिल्ला अधिकारी रामप्रसाद भट्टराईले जनता भ्वाइसलाई जानकारी दिए ।