नगरपालिकाले वडा कार्यालय खोल्न सूचना जारी गरेपनि मन्थली १२ बन्द रहने

भदौ ०३ । जनता भ्वाइस संवाददाता, रामेछाप
मन्थली नगरपालिकाले आफ्नो एकजना कर्मचारी कोरोना संक्रमित भएर नगरपालिका बन्द भएको अवस्थासँगै आफ्ना वडा कार्यालयहरु पनि बन्द रहने सूचना जारी गरेको थियो । गत साउन ३० गते नगरपालिकाका स्वास्थ्य शाखाका एकजना कर्मचारीमा कोरोना संक्रमण पोजेटिभ देखिए उक्त कार्यालय सिल गरिएको छ ।


नगरपालिकाले गत भदौ २ गते अर्को सूचना निकाल्दै बन्द रहेका वडा कार्यालयहरुमा नियमित कार्यसंचालन गराउन सूचना जारी गरेपनि आज फेरि मन्थली १२ नं. वडाले एक सूचना निकाली अर्को सूचना नभएसम्म आफ्नो वडा कार्यालय बन्द रहने बताएको हो ।


वडाध्यक्ष कृष्णहरि अधिकारीद्वारा हस्ताक्षरित सूचना अनुसार आगामी भदौ ४ गतेबाट अर्को सूचना नभए सम्मको लागि वडा कार्यालय बन्द रहने जनाएको हो ।


यसै सन्दर्भमा सो वडाका वडाध्यक्ष अधिकारीलाई ‘नगरपालिकाले कार्यसंचालन गर्न निर्देशन गरेपनि किन वडा कार्यालय बन्द गर्ने सूचना निकाल्नुभयो ?’ भन्ने जनता भ्वाइसकाे जिज्ञासामा अध्यक्ष अधिकारीले भने,
‘नगरपालिकाले वडा कार्यालय संचालन गर्न निर्देशन त दिएको थियो । तर महिलाहरुको महान पर्व हरितालिका तीजको कारणले २ दिनको लागि मात्रै बन्द गरिएको हो । तीजपछि लगत्तै वडाको कार्य संचालन पूर्ववत् हुनेछ ।’


तर सूचनामा भने अर्को सूचना जारी नभएसम्म भनिएकोले समय किटान नगरिँदा स्थानीयबासीमा कहिले वडा कार्यालय खुल्ने हो ? भन्ने अन्यौल देखिएको छ ।