एकसाता थपियाे निषेधाज्ञा, जनजीवन थप प्रभावित्

भदाै ०५ । चितवन ।

देशमा कोरोना भाइरस कोभिड १९ को संक्रमण दिनदिन बढ्दै जान थालेपछि चितवन जिल्लामा निषेधाज्ञा एक हप्ता थप गरिएको छ ।


अस्ति शुक्रबार बसेको जिल्ला सुरक्षा समितिको बैठकले शुक्रबार राति १२ बजेदेखि लागु हुने गरी भदौ १२ गते राति १२ बजेसम्म निषेधाज्ञा थप गरेको हो । यसअघि ६ वटा मात्रै स्थानीय तहमा निषेधाज्ञा जारी गरिएकामा यसपटक भने सबै सातबटै स्थानीय तहमा निषेधाज्ञा लागू हुने चितवनका सहायक प्रमुख जिल्ला अधिकारी नेत्रप्रसाद शर्माले जानकारी दिएका छन् ।


यसअघि साउन ३२ गतेबाट जिल्लाका माडी नगरपालिका बाहकेकका स्थानीय तहमा निषेधाज्ञा लागू गरिएको थियो । शुक्रबारै बसेको सुरक्षा समितिको बैठकले अत्यावश्यक सामान किन्न साँझ र बिहानको समयमा खुल्ला गरिएको बेला सवारी साधनको प्रयोग गरी लामो दूरीको यात्रा गर्ने र घुमफिर गर्ने पाइएको भन्दै त्यसमा कडाइ गर्ने निर्णय गरेको छ ।


नजिकै रहेको पसलबाट अत्यावश्यक सामान पैदल यात्रामा गएर किन्न र निश्चित दूरी कायम गर्न सबैमा अनुरोध गर्ने र पालना भए नभएको अनुगमन गरिने सहायक प्रजिअ शर्माले बताए ।
चितवनमा कोरोना संक्रमितको संख्या तीन सय नाघेको छ बिहीबार मात्रै जिल्लामा २२ जना संक्रमित थपिएका थिए ।


कोरोनाबाट झण्डै ३० जनाभन्दा बढी स्वास्थ्यकर्मी संक्रमित बनेका छन् । अहिलेसम्म जिल्लामा चार जनाको कोरोना संक्रमणबाट मृत्यु भइसकेको छ ।


चितवनका अस्पताल, कृषि उद्योगहरुलाई कोरोना जोखिमको क्षेत्र मानिएको छ ।