असोज १ गतेदेखि खाँडादेवीको विद्यालयहरु खुल्ने, कक्षा संचालनको तयारी यस्तो छ

भदौ २९ । जनता भ्वाइस संवाददाता, रामेछाप ।
जिल्लाको खाँडादेवी गाउँपालिकाले आगामी असोज १ गतेदेखि विद्यालयहरुमा पठनपाठन सुरु गर्ने भएको छ ।


पालिकाभित्र रहेका सम्पूर्ण विद्यालयहरुको पठनपाठन ३ सिफ्टमा संचालन गरिने पालिका अध्यक्ष प्रेमबहादुर तामाङ्ले जानकारी दिएका छन् ।


बिहान ७ देखि ११, बिहान ११ देखि दिउँसो २ र दिउँसो २ देखि अपरान्ह ५ बजेसम्म विद्यालयहरु संचालन गरिने भएको हो ।


आज पालिका क्षेत्रभित्रका विद्यालयका प्रधानाध्यापकहरुको बैठकमा यस्तो निर्णय भएको हो । विद्यालय संचालन गर्दा नेपाल सरकारले निर्धारण गरेको कोरोना रोकथाम तथा सतर्कताका मापदण्डहरुलाई उच्च रुपमा पालना गरिने तयारी भएको छ ।


जनता भ्वाइससँग कुराकानी गर्दै अध्यक्ष तामाङ्ले भने, ‘लामो समयदेखिको विद्यालयको पठनपाठन बन्द हुँदा आम विद्यार्थीहरुमा समस्या परेको छ । कोरोनाको प्रभाव कति समयसम्म चल्ने भन्ने कुनै टुङ्गो नभएको कारण उच्च सतर्कता अपनाएर विद्यालयहरु संचालन हुने तयारीमा छन् । भोलि कुनै संक्रमणको सम्भावनको संकेत देखियो भने पनि यो कार्य बन्द गर्नेछौं । जति बेलासम्म चलाउन सकिन्छ चलाउन त परिहाल्यो ।’

खाँडादेवी सहित् जिल्लाका अन्य पालिकाहरुमा पनि विद्यालयको नियमति पठनपाठन संचालन गर्ने सम्बन्धी तयारी भइरहेको जानकारी प्राप्त भएको छ ।