पानी पर्याप्त नहुँदा दुषित् पानी भएपनि पिउँदै नगरपालिकाका स्थानीय

१० असोज । प्रवीन अधिकारी, रामेछाप ।


मन्थली नगरपालिका वडा नम्बर १२ गेलु स्थित घुर्पांङ्ग र अम्बास गाउँमा खानेपानीको चरम समस्या देखिएको छ । वर्षायामको समयमा पनि खानेपानीको चरम समस्या देखा पर्न थालेपछि हिँउद याममा खानेपानीको हाहाकार हुनसक्ने भन्दै स्थानीयहरु चिन्तित बनेका छन् ।


स्थानीय बासिन्दाका अनुसार २०४३ सालमा युनिसेफ नामक संस्थाले निर्माण गरिदिएको भुत्याए खोला खानेपानी आयोजनाकै भरमा करिब २ सय घरधुरी निर्भर रहेपनि अहिले मुहानको सहि संरक्षण तथा मर्मत संभार नहुँदा खानेपानीको चरम समस्या निम्तिएको हो ।


२०७० मा जिल्ला खानेपानी विकास आयोजनाद्वारा उक्त मुहान पुनर्निर्माण भएपनि २०७२ सालको भूकम्प पश्चात्, मुहानमा पानी सुक्दै गएको र ट्यांकी समेत चर्किएका कारण थप समस्या निम्तिएको उक्त खानेपानी उपभोक्ता एवम्, चौकीदार गणबहादुर बुढाथोकी बताउँछन् ।


उनका अनुसार २०७२ को भूकम्प पश्चात् उक्त मुहान समेत चर्किएको, कहिँकतैबाट पनि मर्मत संभार नभएको, पानी सुक्दै गएको र भएको पानी पनि मुहान नजिकैका खेतबारीमा लगाउने गरेपछि यो समस्या निम्तिएको हो ।


गत निर्वाचनताका विभिन्न राजनितीक दलको चुनावी नारा समेत बनेको खानेपानी समस्या अझैसम्म कायम नै रहेको र आगामी निर्वाचनमा पनि खानेपानी समस्या चुनावी नारा बन्ने स्थानीय युवाहरु बताउँछन् ।


हाल उक्त मुहानको पानी बिहान र बेलुकाको समयमा वितरण गर्दै आएपनि पर्याप्त मात्रामा खानेपानी समेत उपभोग गर्न नपाएको र उक्त मुहान धेरै फोहोर रहेका कारण भएको पानी समेत दूषित रहेको पाइएको छ । उक्त विषयमा सम्बन्धित निकायसँग बुझ्दा पानी जाँच्ने मेसिन समेत नभएको पाइएको छ ।


भूकम्पका कारण नजिकै रहेका कुवा, पँधेरो र धारा सुक्दै गएपछि स्थानीय बासिन्दाको जनजीवन थप कष्टकर बनेको छ । निर्माणाधीन चर्चित गेलु लिफ्ट सिँचाइ खानेपानी आयोजनाको काम समेत अलपत्र परेपछि स्थानीय बासिन्दा अन्योलमा परेका छन् ।


तत्कालीन समयमा रामेछाप जिल्लाका २७ भन्दा बढी गाविसलाई सरकारले नै सुख्खग्रस्त गाविस घोषणा गरेको थियोे । ०७२ सालमा गएको विनाशकारी भूकम्पको कारण भएको खानेपानीको मुहान पनि सुक्दै गएपछि समस्यामाथि समस्या थपिएको छ ।