जिल्ला प्रशासन कार्यालय भन्छ, ‘विद्यालयमा हुने काेराेना संक्रमणको जिम्मा विद्यालयकै ।’

असोज २० । जनता भ्वाइस संवाददाता, रामेछाप ।
पछिल्लो समयमा जिल्लामा खुलेका वैकल्पिक सिकाई केन्द्रहरुमा कोरोना भाइरस सतर्कता सरकारी मापदण्ड पालना नगरिएको जिल्ला प्रशासन कार्यालय, रामेछापले जनाएको छ । भर्खरै एक सूचना जारी गर्दै कार्यालयले स्थानीय तहको उच्च जिम्मेवारीमा खोलिएका वैकल्पिक सिकाई केन्द्रहरुमा अनुगमन गर्दा कोरोना सतर्कता नअपनाइएको पाएको हुँदा भोलि हुने सम्भाव्य जोखिमको जिम्मा विद्यालय नै लिनुपर्ने आषयको सूचना प्रकाशित गरेको छ ।


प्रमुख जिल्ला अधिकारी रुद्रादेवी शर्माद्वारा हस्ताक्षरित सूचना अनुसार हालसम्म जिल्ला प्रशासन कार्यालयको अनुगमनबाट सिकाई केन्द्रमा सरकारले जारी गरेको सतर्कता मापदण्डको पूर्ण रुपमा पालना भएको नदेखिएको भन्दै हालका लागि मापदण्डको पालना गर्न गराउन सचेत गराइएको भनिएको छ ।


जिल्ला संचालित विभिन्न विद्यालयहरुले आफ्ना विद्यार्थीहरुलाई वैकल्पिक सिकाई केन्द्र मार्फत शिक्षण सिकाई क्रियाकलापमा सहभागी गराएको अवस्था छ । यस्ता सिकाई केन्द्रहरुमा सरकारी मापदण्डको पालना भए नभएको हेर्ने जिल्ला प्रशासन कार्यालयले आफूले नै सूचना जारी गर्दै भेला, समारोह, प्रदर्शन, तालिम, गोष्ठी लगायत संचालन गर्न नपाइने भन्दा भन्दै पनि सदरमुकाम मन्थलीमा हुने विभिन्न तालिम तथा सेमिनारहरु भने खुलेआम हुँदा समेत बेवास्ता गरेको देखिएको छ ।


केहीदिन अघि जिल्लाको एक एनजिओले मन्थलीको जिएस होटलमा ३४ जना व्यक्तिहरुलाई सहभागी गराएर २ दिन तालिम गराउँदा समेत जिल्ला प्रशासन कार्यालय मौन रहेको थियो । जुन सूचना पहिलो दिनको तालिम संचालन हुँदै गर्दा जिल्ला प्रशासन कार्यालयले पाइसकेको थियो ।