भ्रष्टाचारको आरोपको खण्डनमा वडाध्यक्षको प्रेस विज्ञप्ती, यस्तो छ विज्ञप्ती

असोज २६ । सविना कार्की, रामेछाप ।
लिखु तामाकोसी गाउँपालिका वडा नं. २ वडाध्यक्ष पदमबहादुर तामाङले बिजुलीको मिटर बक्समा आफूमाथि लागेको लान्छनाको प्रेस बिज्ञप्ती मार्फत खण्डन गरेका छन् । तामाङले आज एक विज्ञप्ती सार्वजनिक गर्दै सैपुमा भएको विद्युतीकरणमा उपभोक्तासँग अनाधिकृत रुपमा रकम असुलेको भन्ने आरोप निराधार भएको धारणा सार्वजनिक गरेका छन् ।


उक्त विद्युतीकरणको सन्दर्भमा आफ्नो विरुद्धमा विभिन्न अनलाइन तथा पत्रपत्रिकाले भ्रामक समाचार संप्रेषण गरेको र उक्त बारेमा सत्यतथ्य प्रकाशन प्रशारण गरेजस्तो नभएको आषय व्यक्त गरेका छन् ।


विद्युतीकरणको क्रममा प्रति घरधुरी २ हजार ७ सय रुपैयाँ असुल गरी ५ सय २३ रुपैयाँ प्रति घरधुरी बराबरको रकम भ्रष्टाचार गर्न खोजिएको भन्ने समाचार प्रकाशन प्रशारण गर्ने मिडियाकर्मीहरुलाई गत आर्थिक वर्षमा यसै वडा भित्र मिटर जडान गर्ने व्यक्तिले आफूखुशी रकम असुल गरेको विषयमा समेत खोजी गरिदिन तामाङले आग्रह गरेका छन् ।


आफू र आफ्नो वडा कार्यालयका विषयमा उठेका हरेक सबालको जिम्मेवारपूर्वक जवाफ दिनका लागि आफू सदैब तयार रहेको बताउँदै तामाङ्ले विभिन्न मिडियाले जुनसुकै कुरा उल्लेख गरेका भएपनि लिखु तामाकोसी गाउँपालिकामा हाल २ सय ७८ वटा र विगत २ वर्ष देखि फाइलिङ नमिलेको भन्दै फाइल रोकी मिटर जडान नगरिएको ठाउँको २७ वटा समेत गरी जम्मा ५ सय ५ वटा मिटर प्राधिकरणले उपलब्ध गराएको समेत जारी प्रेस विज्ञप्तीमा उल्लेख गरेका छन् ।


उनले आफ्नो बारेमा गलत समाचार आएको भन्ने तर्फ इङ्गित गर्दै जिल्ला प्रहरी कार्यालय, रामेछापमा विद्युतीकरणको सवालमा बढी लिएको पैसा फिर्ता गर्छु भन्ने आषयको कागज गरेको भन्ने खाले विविध विषय उठेको प्रति सङ्केत गर्दै बजारमा आएका हल्ला तथा अफबाहहरु भ्रामक भएको समेत टिप्पणी गरेका छन् ।