विटार पार्कमा देवकोटाको सालिक पुनर्स्थापन


२८ कार्तिक, मञ्जु उप्रेती, रामेछाप ।

रामेछापका सहयोगी मनहरु रासमद्वारा निर्माण गरिएको विटार पार्कमा महाकवि लक्ष्मी प्रसाद देवकोटाको सालिक पुनस्र्थापना गरिएको छ । २०६१ सालमा प्रमुख जिल्ला अधिकारी चुडामणि बस्यालको नेतृत्वमा मन्थलीको देवकोटा चोकमा राखिएको देवकोटाको अर्धकदको पहिलो मुर्तिलाई मन्थली उमाबि २०६२ सालको एसएलसी व्याचले विटार पार्कमा पुनस्र्थापन गरेको हो ।


पुनर्स्थापित सालिकको लक्ष्मी पुजाको अवसर पारेर शनिवार अनावरण गरिएको छ । प्रमुख अतिथि मन्थली क्याम्पसका पुर्व क्याम्पस प्रमुख गुन्ज बहादुर श्रेष्ठले अर्धकदमा राखिएको घुम्टो हटाएर शालिकको अनावरण गरेका थिए । स्थानिय मुर्तिकार मन्थली नगरपालिका १ का गजेन्द्र बहादुर थापाले तयार गरेको उक्त मुर्ति जिल्ला सदरमुकाम मन्थलीको मुख्य चोकलाई देवकोटा चोक भनेर चिनाउन सफल बनेको थियो । पछि उक्त मुर्ति नमिलेको भन्दै हटाएर अर्को मुर्ति फेरिए पछि उक्त मुर्ति केही समय देवकोटा चोकमा वेवारिसे जस्तै बनेको थियो ।

पछि शैक्षिक प्रयोगमा काम आउन सक्ने भन्दै मन्थली उमावि उठाएर विद्यालयमा हातामा लगेर संरक्षण गरी राखेको थियो । हामीले चोकमा अलपत्र अवस्थामा देखे पछि विद्यार्थीहरुका लागि शैक्षिक सामग्रीमा रुपमा प्रयोग गर्न सकिन्छ भनेर विद्यालयमा ल्यायौ र संरक्षण गरेर राख्यौ मन्थली उमाविका प्रधानाध्यापक टंक प्रसाद दाहालले बताए ।

विद्यालयमा रहेको उक्त मुर्तिलाई सोही विद्यालयका २०६२ सालका एसएलसी व्याचले पार्कमा लगेर सालिक बनाउने सल्लाह गरेर सबैको सहमतिमा पार्कमा सालिक पुनस्र्थापना गर्न सफल बनेको २०६२ व्याचका जयाराम मानन्धरले बताए । उनले स्थानीय मुर्तिकारले बनाएको मुर्तिको अपमान सहित देवकोटाको पनि अपमान भए झै लागेर आफूहरु सालिक निर्माणमा पुगेको मानन्धरले बताए ।
सालिक पुनस्र्थापना पछिको अनावरण कार्यक्रममा बोल्दै मुर्तिकार गजेन्द्र बहादुर थापाले सालिक आफूलाई नसोधी हटाएकोमा वेवारिसे देख्दा मनमा खल्लो लागेको बताए । पछि मन्थली उमाविमा संरक्षण गरेर राखेको थाहा पाउदा केही खुशी लागेको तर आज त्यही मुर्तिमा विटार पार्कका सालिकका रुपमा पुनस्र्थापित भएको देख्न पाउदा निकै खुशी लागेको बताए ।

अनावरण कार्यक्रममा मुर्तिकार गजेन्द्र बहादुर थापालाई कदर पत्र सहित दोसल्ला ओढाएर सम्मान गरिएको थियो भने मन्थली उमाविलाई कदर पत्रले सम्मान गरिएको थियो । हामीले स्थानीय कलाको सम्मान गर्दै इतिहासको जगेर्ना गर्नका लाीग् यो त एउटा उदाहरणको काम गरेका हौ । अझै केही गर्न सकिन्छ कि भनेर योजना बनाइ रहेका छौ्र २०६२ व्याचका रोशन खडकाले बताए ।


कार्यक्रमका प्रमुख अतिथि गुन्ज बहादुर श्रेष्ठले आफुले पढाएका विद्यार्थीले गरेको कामको पंशसा गर्दै परिवर्तनका लागि युवामा आउने यस्तै खाले सकारात्मक सोचले प्रगति हाँसिल गर्न सकिने बताए । उनले युवामा ध्यान र नयाँ सोचको विकास हुने सके परिवर्तन संभव रहेको बताए । मन्थली उमाबि २०६२ सालको एसएलसी व्याचको आर्थिक सहयोगमा निर्माण भएको उक्त सालिक निर्माण कार्यमा रामेछापका सहयोगी मनहरु (रासम) ले समेत सहयोग गरेको थियो ।