होमस्टेको सिको गर्न गोकुलगंगा हेरे पुग्छ (भिडियो सहित)


मंसीर ९, रामेछाप ।
अर्गानिक कृषि व्यवसाय र पर्या पर्यटनलाई प्रवर्धन गरेर मात्र आफ्नो पालिका समृद्ध हुन्छ भन्ने मान्यतामा दृढ रहेको गोकुलगंगा गाउँपालिकाले पर्यटन प्रवर्धनका लागि घरबास अर्थात् होमस्टे संचालनको कार्यलाई द्रुत गतिमा अगाडि लगेको छ । गाउँपालिकाको १ नं. वडा चुचुरेको शिवालय, गर्जाङ, खरानेटार, चाके लागयतका क्षेत्रमा होमस्टे निर्माणको कार्यलाई बढावा दिएको हो ।
चुचुरेको खरानेटार भन्दा केही माथि रहेको चाके भन्ने स्थानमा बागमती प्रदेश सरकारको लगानीमा होमस्टे निर्माण भएको छ । उद्योग, पर्यटन, वन तथा वातावरण मन्त्रालय हेटौंडाको कूल पचासलाख रुपैयाँमा निर्माण भएको होमस्टे संचालन हुने तयारीमा रहेको छ । पाँच पोखरी, जट्टा पोखरी, भाले पोखरी, तामे लगायतका क्षेत्रको पदमार्गसँगै निर्माण भएको होमस्टेमा आन्तरिक तथा बाह्य पर्यटकहरुको बसोबास रहने सामुदायिक अवास गृह निर्माण उपभोक्ता समितिकी अध्यक्ष मञ्जुमाया कार्की बताउँछिन् ।


हाल भौतिक निर्माणको चरण समापन भइसकेको भएपनि होमस्टेको भित्री डेकोरेशन तथा जोरजाम भने केही समयपछि मात्र हुने कार्कीको भनाइ रहेको छ । चुचुरेको खोसिङ्खर्क भन्ने स्थानसँगै बन्न लागेको भ्यूटावर निर्माण भएपछि लगत्तै चाके क्षेत्रबाट पदमार्गको संचालन हुने निर्माणपक्षले जनाएको छ ।

गोकुलगंगाको चुचुरे क्षेत्रमा भएका पर्यटकीय स्थलहरुका कारणले खरानेटार, गर्जाङ तथा चाके क्षेत्रको निकै सुन्दर भविष्य देख्न सकिन्छ । आन्तरिक तथा बाह्य पर्यटकहरुको आवतजावत बढ्दै गएपछि यो ठाउँका अन्य घरहरुमा समेत होमस्टे संचालन गर्नुपर्ने आवश्यकता छ । यो वास्तविकतालाई गोकुलगंगा गाउँ कार्यपालिका सदस्य लोककुमारी गुभाजु ‘ललिता’ समेत स्वीकार्छिन् ।


विश्वको सर्वोच्च शिखर सगरमाथा तथा खुम्बु क्षेत्रमा प्रवेश गर्ने एउटा अर्को नाका पनि यसै स्थानबाट गएको छ । सगरमाथा पदमार्गको रुपमा समेत गनिएको गर्जाङ क्षेत्र नजिकै रहेका अन्य धेरै स्थानहरु समेत पर्यापर्यटनका लागि सम्भावना बोकेका क्षेत्रहरु हुन् । प्रदेश सरकारकै लागनीमा चाकेमा बनेको होमस्टे संचालनको आवश्यकतालाई स्थानीय ज्ञानी शेर्पाले स्थानीय स्तरमा हुने रोजगारीसँग यसको फाइदालाई जोडेकी छिन् ।


रामेछाप जिल्लाका सबै पालिकाहरु जस्तै गोकुलगंगा गाउँपालिमा अझ धेरै प्राकृतिक विशेषता रहेको छ । यस क्षेत्रमा हुने जडिबुटी तथा अर्गानिक उत्पादनले हालका दिनमा समेत यस गाउँपालिकालाई निकै टेवा पुर्याएको छ । झन यस्ता होमस्टे संचालन हुँदैगर्दा आन्तरिक श्रोतको उपार्जनमा यस गाउँपालिकालाई निकै सहज हुने देखिन्छ । आफ्नो वडामा भएको पर्यटकीय सम्भावना तथा त्यसको प्रचारप्रशारमा आफू र आफ्नो गाउँपालिकाले समेत विशेष महत्व दिएको र अझ त्यसलाई थप प्रभावकारी बनाउने तर्फ आफ्नो योजना रहेको गोकुलगंगा गाउँपालिका वडा नं. १ का अध्यक्ष मणिकुमार लामा भन्छन् ।