अब हामीले भोट माग्ने ठाउँ नै छैन : मन्त्री ढुङ्गेल (भिडियो सहित)

नेपाल कम्युनिष्ट पार्टी (नेकपा) को कामको स्वाद लिने बेला नभएको बागमती प्रदेश आर्थिक मामिला तथा योजना मन्त्री कैलाशप्रसाद ढुङ्गेलले बताएका छन् । मन्थली नगरपालिका वडा नंं १३ मा रहेका श्री मा.वि. हर्रे चिण्डेको नव निर्मित विद्यालय भवन उद्घाटन गर्ने क्रममा बोल्दै उनले यस्तो धारणा राखेका हुन् ।

उनका अनुसार एउटा किविको फल खान त ३ वर्ष कुर्नु पर्छ भने सरकारको कामको प्रतिफल लिन अझै समय कुर्नु पर्छ । नेकपाको सरकार आएपछि सडक कालोपत्रे धेरै भएको छ र बिजुलीबत्ती समेत धेरै बलेको छ । नेकपा सरकारको यस्तो काम देखेर नागरिकहरू आत्तिई सकेको मन्त्री ढुङ्गेलको कथन छ ।

ढुङ्गेल थप्छन्:अब हामीले भोट माग्ने ठाउँ नै छैन । नागरिकलाई चाहिने जति सेवा सुविधा हामीले दिई सकेका छौँ । अब के भनेर भोट माग्ने ? कालो पत्रे चाहिँदैन भने भोट देउ भनेर माग्ने ? कि विद्यालयहरू चाँहिदैन भनेर भोट माग्ने ? हामीले सुविधा सम्पन्न विद्यालय बनाई सकेका छौँ । हामीले सडकहरू धमाधम कालोपत्रे गरेका छौँ । गाँउगाउँमा बिजुली बत्ती पुर्याएका छौँ ।’

मन्तव्यका क्रममा नेपाली कांग्रेसले कहि कतै बाटो नबनाएको मन्त्री ढुङ्गेलले आरोप लगाएका छन् । मन्त्री ढुङ्गेलका अनुसार काम गरे पछि बिग्रने भत्कने हो । नेकपाको सरकारले काम गरेको छ, बाटो बनाएको छ र त भत्किन्छ । नेकपाको सरकारले गरेको विकास देखेर डाहा गरेको प्रष्ट देखिन्छ ।