नेपाल उद्योग वाणिज्य महासंघ, बागमती प्रदेश निर्वाचनका लागि रामेछापबाट श्याम थापाको उम्मेदवारी घोषणा ।

मंसिर ३०, रामेछाप


नेपाल उद्योग वाणिज्य महासंघ, बागमती प्रदेशको आसन्न निर्वाचनका लागि रामेछापबाट निर्वतमान अध्यक्ष श्याम थापाले उमेद्वारी दिने भएका छन् । मंगलबार रामेछाप उद्योग वाणिज्य संघको कार्यालय, चेम्बर भवन मन्थलीमा अध्यक्ष केशवप्रसाद घिमिरेको अध्यक्षतामा बसेको बैठकले यस्तो निर्णय गरेको संघका कार्यकारी प्रमुख नविन मनोहरले जानकारी दिएका हुन् ।


आगामी पौष ११ गतेदेखि १३ सम्म हुने साधारण सभा तथा निर्वाचनका लागि आफ्नो उम्मेदवारी रहने थापाले बताएका छन् । यद्यपि आफूले कुन पदका लागि निर्वाचन सामना गर्ने भन्ने बारे निर्णय नभइसकेको थापा बताउँछन् । प्रदेशका विभिन्न व्यवसायिक समस्याहरुको उठान र त्यसको सही व्यवस्थापनका लागि आफूले पहिलादेखि नै सोचिराखेको र त्यसका लागि काम गर्न आफूलाई मनैदेखि जाँगर लागेको जनता भ्वाइसँग कुराकानी गर्दै थापाले बताएका छन् । ‘प्रदेश स्तरको नेपाल उद्योग वाणिज्य महासंघमा यहाँको जित भयो भने के के काम गर्नुहुन्छ ?’ भन्ने जिज्ञासामा थापा भन्छन्,

‘पहिलो कुरा त प्रदेशको अवधारणा आएको धेरै भएको छैन । यस्तो अवस्थामा प्रदेशस्तरीय नेपाल उद्योग वाणिज्य महासंघलाई खुट्टा टेकाउनु नै मुख्य जिम्मेवारी हो । यतिबेला प्रदेश महासंघ निकै कमजोर छ । प्रदेश स्तरको महासंघका लागि आवश्यक पर्ने नीति नियम तथा मूल कानुन नै पूर्णरुपमा बनेको अवस्था छैन । हिँड्ने गोरेटो नै फराकिलो नभएपछि यात्रा कति सम्म सहज हुन सक्ला र ? त्यसैले मेरो जितले बागमती प्रदेशका सम्पूर्ण व्यवसायिहरुका लागि कानुनको निर्माण गरी सोको सही अनुभूति गराउने प्रयास रहने छ ।’


पछिल्लो समय कोरोना भाइरस कोभिड १९ का कारण सम्पूर्ण आकारका व्यवसायीहरुमा निकै ठूलो संकट देखिएको छ । कुनै व्यवसायीहरु पनि सहज ढंगले व्यवसाय विस्तार गर्न सकिरहेको अवस्था छैन । बागमती प्रदेशका हरेक व्यवसायीहरुको आम समस्यालाई आफूले निराकरण गर्न राज्यस्तरसँग पहलका लागि काम गर्ने बारेको धारणा थापा राख्छन् । व्यवसायीहरुको आम समस्या भनेकै बैंकिङ् कारोबारमा आएको समस्या भएको र बैंकको ब्याज तिर्न नसक्ने अवस्था भएका कारण धेरै व्यवसायीहरु सटर ताला लगाएर पलायन हुनुपर्ने अवस्था आएको थापाको ठहर छ ।
यसै सम्बन्धमा बागमती प्रदेशका व्यवसायीहरुको आम समस्याको बारेमा के गर्नुहुन्छ ? भन्ने जिज्ञासाको जवाफमा थापा अगाडि भन्छन्,

‘एउटा चिया पसलेले दूध र चिनीको मूल्य चुकाउन नसकेको अवस्थामा आफ्नो व्यापार नै बन्द गर्नुपर्ने स्थिति छ । यसरी त्यो व्यवसायीले चिनी र दूधको मूल्य चुकाउन नसक्दा त्यसको असर खुद्रा या होलसेल व्यवसायी, आयातकर्ता, कृषक र अन्त्यमा राज्यस्तरमा समेत त्यसले ठाडो असर पार्दछ । यसैलाई न्यूनिकरण गर्नका लागि राज्यले मर्कामा परेको व्यवसायी केन्द्रित नगद राहतको व्यवस्था गर्नुपर्ने कुरालाई अब जोड गर्नुपर्छ । यदि साँच्चै मर्कामा परेका व्यवसायीलाई आर्थिक राहतको प्याकेज मार्फत् व्यवसायमा टिकाइराख्ने र कोरोना भाइरसका कारण व्यवसायमा देखावटी मर्का परेको देखाउने व्यवसायीलाई आफ्नो दायित्व चुक्ता गर्न लागाउनु पर्दछ । त्यसका लागि बागमती प्रदेशका सम्पूर्ण जिल्लाका व्यवसायीहरुको खुशीका लागि काम गर्ने रहर छ ।’


नेपाल उद्योग वाणिज्य महासंघ, बागमती प्रदेशमा हुने निर्वाचनका लागि थापाको उम्मेदवारीको निर्णय रामेछाप उद्योग वाणिज्य संघले आकस्मिक बैठक मार्फत् गरेको जानकारी दिएको छ । थापाको जस्तै प्रदेश निर्वाचनका लागि उम्मेदवारीका आकाँक्षी रामेछाप उद्योग वाणिज्य संघका पूर्व अध्यक्ष पशुपतिबहादुर खड्काको समेत रहेको स्रोतले बताएको छ ।