सत्तामा टिकिराख्न भ्रम फैलाउनु कम्युनिष्टको विशेषता हो – श्रेष्ठ

रामेछाप, ८ माघ

पञ्चायतकाल देखि पञ्चायत विरोधि स्थलको रूपमा चिरपरिचित स्थान हो साविकको कठजोर गाउँ विकास समिति । नेपाली कांग्रेसको इतिहास पल्टाउने हो भने यो स्थल सजिलै भेट्न सकिन्छ । रामेछाप जिल्लामा कांग्रेसको राजनितिको लागि विशेष हेरिने यो स्थानले कैयौँ योद्दाहरू जन्माएको छ ।

कांग्रेस राजनितिको उर्वर थलो मानिने कठजोर (मन्थली नगरपालिका-३ ) मा पनि  नेपाली कांग्रेसको केन्द्रिय नीति बमोजिम घोषणा गरीएको वडास्तरिय विरोध कार्यक्रम सम्पन्न भयो ।

नेपाल कम्युनिस्ट पार्टीको नेतृत्वको सरकारले गरेको प्रतिनिधि सभा विघटनको असंवैधानिक र अलोकतान्त्रिक कदमका विरुद्ध नेपाली कांग्रेसले देश भरका सबै वडा स्तरबाट विरोध प्रदर्शन गरेको थियो ।

रामेछाप कांग्रेस जिल्ला कार्य समितिका सदस्य एवंम् केपीए अध्यक्ष घननारायण श्रेष्ठ (घनश्याम) ले सभालाई संवोधन गर्दै ‘ यो कम्युनिस्टहरुको सत्ता हो जहाँ बाहुबल, बन्दुकका गोली र बोलीका गोलीले मात्र सम्भव हुन सक्छ, संविधानतः यो सम्भव छैन , संविधानत: संसद विघटन अवैधानिक छ।  कुनैपनि चीजको व्याख्या दार्शनिक, बिचारक र ज्ञानीहरुले परीभाषित गरेभन्दा ठ्याक्कै उल्टो व्याख्या कसैले गर्छ भने त्यो कम्युनिस्टले मात्र गर्छ र सत्ता र शक्तिमा टिकीराख्नको लागि जनतामाझ काल्पनिक भ्रम फैलाउनु उनीहरुको बिशेषता नै हो, तर यो २१ओै सताब्दिमा सम्भव छैन ।’ भन्ने तर्क राखे ।

सभामा मन्थली न.प.का नगर सभापति तथा वडा न. ३ का अध्यक्ष केशव कुमार, सोहि वडाका वडा सदस्य नारायण बहादुर बोगटी, क्षेत्रीय सदस्य आकाश भट्टराईलगायतले संसद विघटनको चर्को विरोध गरेका थिए ।

सभा कमल के.सी सभापतित्वमा भएको थियो ।