कालोपत्र सडक निर्माण नसकिदै भत्कियो (भिडियो सहित)


रामेछापको खाँडादेवि गाउँपालिकामा सकड कालोपत्रे गरिएको एक हप्ता पनि नवित्दै भत्किएको छ । निर्माण ब्यवसायिले गुणस्तरहिन काम गरेको कारण कालोपत्रे सडक एकहप्ता पनि नटिकेको हो ।
रामेछापको खाँडादेवि गाउँपालिकाको सित्खा, भिरपानी हुँदै गोगनपानी जाने सडक कालोपत्रे गरिएको एक हप्तामै भत्किएको छ । १० किलोमिटर सडक मध्य केही भाग कालोपत्रे गर्न बाँकीनै छ तर कालोपत्रे गरिएको सडक भने भत्किइसकेको छ । कालोपत्रे गरिएको सडक मानिसले हात लगाएर तान्दा गुन्द्री बेरिएझै बेरिन्छ । निर्माण ब्यवसायिले सडकको भित्ता काटेर पुरिएको माटोमाथि नै कालोपत्र गरिएकाले अलकत्राले जमिनमा नसमाएको कारण सडक भत्किएको हो । स्थानीयले सम्बन्धित निकायमा पटक–पटक जानकारी गराउँदा पनि बेवास्ता गरिएको कारण सडक गुणस्तरहिन भएको स्थानीय अर्जुन खड्का को भनाई छ ।
सडकको कतिपय भागमा नाला समेत नबनाई कालोपत्रे गरिएको छ । सो सडकको सवबेस र बेस राख्ने क्रममा सडकको भित्ता काट्दा निस्किएको माटो प्रयोग गरिएकोे थियो ।स्थानीय सरकार र जिल्ला समन्वय समितिले सडकको अनुगमन गरेको भए पनि गुणस्तरमा भने सुधार आएन । स्थानीय सरकार र सम्बन्धित सरोकारवाला निकायको बेवास्ताको कारण सडक गुणस्तरीय बन्न नसकेको स्थानीय उतेन्द्रध्वज खड्काको आरोप छ ।
खाँडादेवि गाउँपालिकाले भने निर्माण ब्यवसायिले गुणस्तरहिन कामलाई पुनर्निर्माण गरि गुणस्तरीय नबनाएसम्म अन्तिम किस्ताको भुक्तानी रोक्ने बताएको छ । निर्माण ब्यवसायिले स्थानीय सरकारलाई समेत अटेर गरेको खाँडादेवि गाउँपालिकाको अध्यक्ष प्रेमबहादुर तामाङ बताउँछन् ।
वागमति प्रदेश सरकारको भौतिक पूर्वाधार विकास कार्यक्रम अन्तर्गत २३ करोड, ७४ लाख ३४ हजार ८ सय २७ रुपैयाँको लागतमा सम्पन्न गर्नेगरि लुम्बिनी आत्रेय जेभीले सो सडक निर्माणको जिम्मा पाएको थियो ।