सन्ताउन्नौं पटक रक्तदान गरे डा. न्यौपानेले, रक्त संकट टार्ने कर्ममा शुभजीवनको सक्रियता


बैशाख ०५, रामेछाप


सिन्धुली जिल्लाको खुर्कोटमा रहेको बहुचर्चित अस्पताल शुभजीवन हस्पिटलका डा. राजन न्यौपानेले ५७ औं पटक रक्तदान गरी हिजो शनिवार उल्लेख्य सहभागिता सहित सो कार्यक्रम सम्पन्न गरेका छन् ।


आम मानवीय स्वास्थ्य सेवा सहित् विशेषगरी स्त्री रोग निदान केन्द्रको रुपमा परिचित शुभजीवन हस्पिटलले नेपाल रेडक्रस सोसाइटी, जिल्ला शाखा रामेछापको सहयोगमा शनिवार रक्तदान कार्यक्रम आयोजना गरेको हो । अस्पतालका कर्मचारी र स्थानीय सहित कूल ४० जना रक्तदाताहरुले उक्त रक्तदान कार्यमा सहभागिता जनाएका थिए ।


विगतका दिनहरुमा नेपालको दुर्गम जिल्ला बाजुरा सेवारत हुँदा सुत्केरी हुन स्वास्थ्य संस्था आएकी महिलालाई आफ्नै रगत दिएर डा. न्यौपानेले बचाएको समाचारहरु प्रकाशन भएका थिए । शनिवार शुभजीवन अस्पतालमा आयोजना गरिएको रक्तदान कार्यक्रममा आफूले ५७ औं पटक रक्तदान गरेको न्यौपानेले बताएका छन् । ‘जीवनमा १ सय पटक रक्तदान जस्तो पुण्यकर्म गर्न मन छ । आफ्नो शरीरलाई कुनै क्षति नहुने तर आफ्नो रगतले अरुको जीवन बाँच्ने भएकोले आफूलाई रक्तदान गर्न जाँगर चल्ने डा. न्यौपानेको कथन छ ।


कोरोना भाइरस कोभिड १९ को दोस्रो चरणको प्रभाव विश्वव्यापि रुपमा देखिरहँदा नेपालमा पनि यसले पार्ने सम्भावित खतरालाई मध्येनजर गरी आफूहरुले रक्तदान कार्यक्रमको आयोजना गरेको शुभजीवन हस्पिटलका मनोचिकित्सक किशोर थापा बताउँछन् । भोलि देशब्यापि रुपमा कोरोनाको संकट आउन सक्ने र अस्पतालहरु बिरामीलाई रगत आवश्यक पर्ने भएकोले केही रगतको जोहो गरेको थापाले बताएका छन् ।