१६ वर्ष पछि निर्दोष सावित भए कार्की

रामेछाप । नेपाली कांग्रेस रामेछापका सचिब लेख बहादुर कार्कीले आफुले १६ बर्ष पछी न्याय पाएका छन् । कार्कीले मंगलवार पत्रकारहरु संग कुरा गर्दै भने – ‘मलाई ठगी मुद्दामा अदालतले १६ वर्ष सम्म अन्याय गर्यो तर आज १६ पछि सफाइ दियो ।  हचुवाको भरमा दिएको मुद्दामा अदालतले समयमा फैसला नसुनाउदा मैले १६ बर्ष अन्यायमा दिन बिताए । ढिला न्याय पाउनु भनेको अन्यायहुनु रहेछ उनले भने ‘मलाई नखाएको विष लाग्यो। त्यो सहकारीको निर्णायक पदमा पनि म थिइनँ म सदस्य मात्र थिए । बजारमा गरेको लगानी नउठेको कारण सहकारी डुबेछ । पैसा उठाउँदै फिर्ता गर्दै गर्ने क्रममा संस्थामा ताला लगाइएपछि केही बचतकर्ताको रकम फिर्ता गर्न बाँकी रहेछ ।आफु जिल्ला आएकोले यी सबै कुरा मलाई थाहा पनि भएन । न सहकारिमा समस्या आएको सबै कुरा थाहा भयो न म माथि मुद्दा परेको कुरा थाहा भयो। मुद्दा हाल्नेहरु अदालतमा प्रमाण लिएर आउन भन्दा पनि वयान दिन गएनछन् तर जिल्ला अदालतको फैसला पछि जेल बस्न पर्यो’ ।

लगातार १६ वर्षसम्म आफूले अपमान र ठगको आरोप सहनु परेको कार्कीले बताए । ‘जेल बसियो, जरिवाना तिरियो, पार्टी भित्र, बाहिर र कतिपय सार्वजनिक स्थानमा समेत अपमानित हुनुपर्यो, कतिपय ठाउँमा बहिष्कृत समेत हुनुपर्यो’ भन्दै कार्कीले गुनासो सुनाए ।

सर्वोच्च अदालतको फैसला बमोजिम आफूले जरिवाना तिरेको रकम फिर्ता पाउने भए पनि जेल बस्दा भएको क्षति र मानसिक रुपमा अपमानित भए वापत पाउने क्षतिपूर्ति कसले दिने ? भन्दै उहाँले प्रश्न समेत गरे ।

कांग्रेस नेता कार्की काठमाडौंको एक सहकारी संस्थाको सञ्चालक समिति सदस्य रहेको बेला सहकारीको पैसा हिनामिना गरी सहकारी डुबाएको भन्दै कार्कीलगायत चार जनालाई गठी मुद्दा लागेको थियो । सो मुद्दामा कार्की सहित चार जनालाई काठमाडौं जिल्ला अदालतले २०६२ साल असार १४ गते जनही २ वर्ष जेल र ६ लाख ८२ हजार ५ सय ५२ रुपैँया जरिवाना सुनाएको थियो ।

द्वन्द्वको बेला भएको र आफू रामेछापमा नै रहेको कारण मुद्दा परेको कुरै थाहा नभएकोले आफूले प्रतिवादी समेत लगाउन नपाएको कांग्रेस नेता कार्कीले बताए । फैसला आएपछि थाहा पाएर २०६४ सालमा १३ महिना ११ दिन जेल बसी सजाय भुक्तानी र जरिवानाको रकम समेत तिरेर कार्की रामेछाप कारागारबाट छुटेका थिए ।

सो मुद्दामा २०६५ माघ १२ गते पुनरावेदन अदालत पाटनले आरोपी मध्ये चन्द्रबहादुर खड्कालाई १ लाख ३६ हजार ५ सय १० रुपैँया जरिवाना गर्ने र अन्यलाई भने जिल्ला अदालतकै फैसला सदर गर्ने फैसला सुनाएको थियो ।

त्यसका विरुद्ध सर्वोच्च अदालतमा परेको मुद्दामा न्यायाधीश तेजबहादुर केसी र पुरुषोत्तम भण्डारीको इजलासले कार्की लगायत चारै जनालाई सफाइ दिएको छ । संयुक्त इजलासले गत पुष १२ गते सो फैसला सुनाएको हो ।