साउन ३१ । जनता भ्वाइस संवाददाता, रामेछाप ।
रामेछाप जिल्ला अस्पतालका डाक्टर तथा कोरोना फोकल पर्सन डाक्टर आनन्दप्रसाद आचार्यले रामेछाप जिल्लामा अझै कोरोना भाइरसको प्रभाव समुदायस्तरमा नपुगिसकेको बताएका छन् ।
जनता भ्वाइससँग कुराकानी गर्दै डाक्टर आचार्यले रामेछाप जिल्लामा पछिल्लो समयमा कोरोनाभाइरस कोभिड १९का बिरामीहरूको संक्रमण बढ्दै गएको अवस्थामा जनस्तरमा त्रास फैलिइरहँदा समुदायस्तरमा नै कोरोनाको प्रभाव पुगिनसकेको बताएका हुन् ।
जिल्लाका विभिन्न पालिकाहरुमा भएको आइसोलेशन वार्डहरुमा रहेका विरामीहरुमा खासै ठूलो र असामान्य लक्षणहरु देखिएको छैन । यसै सन्दर्भमा थप प्रष्ट पार्दै आचार्य भन्छन्,
‘हाल जिल्लामा भएका आइसोलेसन कक्षहरुमा भएका बिरामीहरुमा सामान्य रुघाखोकी, ज्वरो तथा झाडापखालाको समस्या भन्दा बाहेक अन्य केही ठूलो समस्या रहेको छैन । यस्ता प्रकृतिका विरामीहरुलाई हामीले नै यहाँ उपचार गर्न सम्भव भएको छ । जटिल अवस्था कुनै बिरामीको भयो भने हामी उहाँहरुलाई थप उपचारका लागि काठमाडौं पठाउँछौं ।’ डाक्टर आचार्यले प्रष्ट पारेका छन् ।
जिल्लाको कुनै पनि स्थानमा सम्भावित संक्रमित भए र उहाँहरुले होम आइसोलेशनमा बस्न चाहने अवस्थामा पालिकाहरुसँग त्यसको सम्भाव्यता बुझेर मात्रै बस्न दिने उनी बताउँछन् ।
यदि सम्बन्धित पालिकाको स्वास्थ्य शाखाले उहाँहरुलाई उपचारको प्रभावकारी प्रबन्ध गर्न सक्छ भने मात्रै सो सेवा उपलब्ध हुन सक्छ, अन्यथा सम्भव नहुने आचार्यको भनाई रहेको छ ।
पछिल्लो समयमा मन्थली नगरपालिकाका एक कर्मचारी कोरोना पोजेटिभ देखिएपछि होम आइसोलेशनमा बसेको सम्बन्धमा विभिन्न टिकाटिप्पणीहरु आएको सन्दर्भमा डाक्टर आचार्यले सो कुरा बताएका हुन् ।
यसै सम्बन्धमा उनी अगाडि भन्छन्, ‘सामान्य अवस्थाका बिरामी तथा रोगको लक्षण नदेखिएको तर कोरोना पोजेटिभ भएको बिरामीहरुका लागि होम आइसोलेशन उपलब्ध हुन सक्छ । तर त्यो पनि अत्यन्तै बडा अनुशासनको परिधिमा बस्ने मन्जुरी भएमा मात्र । यस्तो अवस्थामा उहाँहरुका लागि सामाजिक उत्तरदायित्व पनि झनै हुने नै भो । समाजमा अन्यत्र यसको फैलावट नहोस् भनेर यो कडाई गरिएको हो । उहाँहरुलाई आवश्यक चिकित्सकीय सेवाका लागि सम्बन्धित पालिकाहरुले व्यवस्था गर्नु पर्छ ।’
आचार्य आइसोलेशनमा बसेका बिरामीहरुमा अत्यन्तै ठूलो मनोबैज्ञानिक असरले प्रभाव राख्ने बताउँछन् । देख्दा बिरामीलाई केही भएको हुँदैन तर उहाँहरुले १४–१४ दिनसम्म आइसोलेशनमा बसिरहनु पर्दा आफ्ना व्यवहारिक कामहरु लथालिङ्ग हुने तथा आफूमा भएको कोरोना पोजेटिभ नै गलत नतिजाका कारण आएको हो कि भन्ने भ्रम रहेको बताउँछन् ।
‘आइसोलेशनमा बसेका बिरामीहरुका लागि मनोपरामर्श कत्तिको उपयुक्त हुन्छ ?’ भन्ने जनता भ्वाइसको जिज्ञासामा आचार्य भन्छन्,
‘यो मनोपरामर्श आवश्यकता चाहिँ छ, तर त्यसको व्यवस्था गर्न राज्यले नै सकेको छैन । अझ भन्दा राज्यले मनोपरामर्शको व्यवस्था देशैभरि कहिँपनि गरेकै अवस्था छैन । आइसोलेशनमा बसेका बिरामीहरुसँग दूरी कायम राख्नुपर्ने भएको कारणले पनि यस्तो सम्भावना नदेखिएको हुन सक्छ ।’
आइसोलेशनमा बसेका बिरामीहरुलाई मानसिक रुपमा संकट पैदाहुने भएको कारण मनोपरामर्शको व्यवस्था हुन सके त्यसको प्रभावकारिता राम्रो हुने डाक्टर आचार्यको ठम्याई रहेको छ ।
