वैशाख ३०,
रामेछाप । रामेछापको खाँडादेवी गाउँपालिका वडा नं ३ भिरपानीमा एकिकृत नमुना माझी बस्ति निर्माणको काम सोमबारबाट सुरु भएको छ ।
सोमबार गाउँपालिकाका प्रमुख प्रेम बहादुर तामाङले नमुना बस्ति निमार्णको शिलान्यास गर्नुभएको हो । पालिकाको आर्थिक वर्ष २०७६÷७७ को वार्षिक कृषि पर्यटनमा समावेश उक्त कार्यक्रम कोरोना भाइरस संक्रमणबाट बच्नको लागि राज्यले गरेको लकडाउनका कारण केहि पछि धकेलिने भएपनि यसै आर्थिक वर्षमा सम्पन्न हुने गरी काम अघि बढाइएको सोही वडाका वडा अध्यक्ष पुष्कर कार्कीले जानकारी दिनुभयो ।
कुल २ करोड २५ लाख बजेटमा उक्त एकिकृत नमुना बस्ती निमार्णको काम सुरु भएको हो ।
बागमती प्रदेश सरकार र खाँडादेवी गाउँपालिकाको साझेदारीमा
प्रदेश सरकारको १ करोड ५० लाख आर्थिक सहयोग र पालिकाको ७५ लाख वार्षिक बजेटमा बस्ति निमार्ण गर्न लागिएको हो ।
निमार्ण हुने बस्तिमा ४२ वटा भुकम्प प्रतिरोधी भवन, पानीको धारा, शौचालय, निर्माण हुने पालिकाका प्रेम तामाङंले बताउनुुभयो । साथै माझी समुदायको संस्कृति झल्कने एक भवन पनि निर्माण गरिने छ ।
बस्ति निर्माणको काम सुरु भएसंगै स्थानियहरुमा खुसी छाएको छ । बस्ति निर्माण भए आन्तरिक तथा बाह्य पर्यटक भित्राई कृषि पर्यटन तथा माझी समुदायको संस्कृती, भेषभुषामा अधारित कार्यक्रमा अघि बढाउने पालिकाको योजना छ ।
बस्ति निर्माणको लागि आत्रिय आर बि सिद्धार्थ जे बि कम्पनीसंग रु २ करोड २४ लाखमा सम्झौता भएको वडा अध्यक्ष पुष्कर कुमार कार्कीले जानकारी दिनुभयो ।
