काठमाडौँ ,१७ बैशाख
निषेधाज्ञा जारी भएका जिल्लामा आजदेखि थप कडाइका गरिने भएको छ । आदेश जारी भएका जिल्लामा यातायात तथा मानीसको आवागमन रोक्ने गृह मन्त्रालयले जनाएको छ ।
हिजो पहिलो दिन भएकाले यातायातका साधनहरू बाटोमै अड्किएर यात्रु अलमल भएकाले केही सहजीकरण गरिएको भए पनि आजदेखि भने कडाइका साथ आदेशको पालना गरिने गृह प्रवक्ता जनकराज दाहालले जानकारी दिए ।
केही जिल्लामा यसअघि नै निषेधको आदेश जारी भएपनि अधिकांश जिल्लामा बिहीबारदेखि आदेश कार्यान्वयनमा आएको छ ।अहिलेसम्म १५ जिल्लामा पूर्ण र तीन जिल्लामा आंशिक निषेधाज्ञा छ ।
यसरी आदेश जारी गर्ने जिल्लामा बाँके, काठमाडौँ, ललितपुर, भक्तपुर, कास्की, कैलाली, पर्सा, कञ्चनपुर, दाङ, पाल्पा, चितवन, रुपन्देही, सल्यान , सुर्खेत र सुनसरी छन् ।कालिकोट, बाग्लुङ र बर्दियामा आंशिक निषेधाज्ञा छ । महानगरीय ट्राफिक प्रहरी महाशाखाले उपत्यकामा बिहीबारको आदेश उल्लङ्घन गर्ने दुई हजारी बढीलाई होल्ड गरेर चेतावनीका साथ अब ननिस्कने शर्तमा छाडिएको जानकारी दिएको छ ।
ठाउँठाउँमा टोली परिचालन गरी सवारी साधन जाँच थर्न थालिएको छ । आज थप कडाइका साथ सवारी जाँच हुने नेपाल प्रहरीका प्रवक्ता बसन्तबहादुर कुँवरले बताए।
निषेधाज्ञा उल्लंघन गरे संक्रामक रोग ऐन, २०२० अनुसार १ महीनासम्म कैद वा १०० रुपैयाँसम्म जरिवाना अथवा दुवै सजाय हुनसक्छ ।साथै संक्रामक रोग ऐन अन्तर्गतको काममा बाधा पुर्याउनेलाई ६ महिनासम्म कैद वा ६०० रुपैयाँ जरिवाना अथवा दुवै सजायको समेत व्यवस्था छ ।
साथै स्थानीय प्रशासन ऐन २०२८ अनुसार प्रशासनको आदेश उल्लंघन गर्नेलाई प्रमुख जिल्ला अधिकारीले ५०० रुपैयाँसम्म जरिवाना वा ! महीनासम्म कैद वा दुवै सजाय दिन सक्ने अधिकारको व्यवस्था गरिएको छ ।
