काठमाडौँ । क्रिप्टो करेन्सीको कारोबारमा संलग्न भएको आरोपमा एकै परिवारका चारजनाविरुद्ध राजश्व अनुसन्धान विभागले काठमाडौँ जिल्ला अदालतमा मुद्दा दर्ता गरेको छ । बिभागले ३७ करोड ६४ लाख ११ हजार १ सय रुपैयाँ बिगो दाबी गर्दै काठमाडौँ जिल्ला अदालतमा मुद्दा दर्ता गरेकोहो ।
कैलालीको लम्किचुवा स्थायी घर भएका दिनेश खड्काबुबा नरबहादुर खड्का, उनकी दिदी भगवती र साथी अनिता धितालविरुद्ध मुद्दा दायर गरिएको हो ।
विभागका अनुसार दिनेशले आफू र परिवारका सदस्यको नाममा आफ्नो बैङ्क अकाउन्टबाट ९ करोड ७९ लाख ९८ हजार ५ सय ८१ रुपैयाँको क्रिप्टो करेन्सीको कारोबार गरेको दाबी गरिएको छ । साथै भगवतीको बैङ्क खाताबाट २० करोड ४२ लाख ९४ हजार ५ सय २६ रुपैयाँ कारोबार भएको विभागको दाबी छ ।
अनिताको खाताबाट ५ करोड ७७ लाख ६ हजार ८६ रुपैयाँ र नरबहादुरको बैङ्क खाताबाट एक करोड ६४ लाख ११ हजार एक सय ६६ रुपैयाँको कारोबार भएको विभागले जनाएको छ । क्रिप्टो करेन्सीको कारोबार ईस्कील, बाइनान्स नामक मोबाइल एप्लिकेन्सबाट भएको विभागले जनाएको छ ।
