रामेछाप । नेपाल पब्लिक क्याम्पस संघ रामेछापको प्रथम जिल्ला अधिवेशनले डा. भरत कुमार श्रेष्ठलाई सर्वसम्मत अध्यक्ष चयन गरेको छ । अधिवेशनले श्रेष्ठको अध्यक्षतामा ११ सदस्यीय कार्यसमिति निर्विरोध निर्वाचित गरेको हो ।
शनिवार जिल्लाको मन्थली नगरपालिका वडा नं. १ स्थित मन्थली सहिद स्मृति बहुमुखी क्याम्पसको सभा हलमा भएको अधिवेशनले सोही क्याम्पसका प्रमुख डा. श्रेष्ठको अध्यक्षतामा नयाँ कार्यसमिति निर्वाचित गरेको हो ।
अधिवेशनले उपाध्यक्षमा मेघ प्रसाद भट्टराई, सचिवमा दिवाकर खड्का, सहसचिवमा लक्ष्मी श्रेष्ठ र कोषाध्यक्षमा राजेन्द्र घिमिरेलाई चयन गरेको छ । साथै सदस्यहरूमा जगदीश बस्नेत,फुलकुमारी गिरी, लक्ष्मीलाल श्रेष्ठ, कृष्णप्रसाद घिमिरे र पूर्णचन्द्र पौडेल चयन भएका छन् ।
गुणस्तरीय शिक्षा नै आजको आवश्यकता भएकोले जिल्लामा रहेका क्याम्पसहरूमा गुणस्तरीय पठन पाठनका लागि आफूले पनि सक्दो सहयोग गर्ने संघिय सांसद पूर्ण बहादुर तामाङले बताए । उनले भने क्याम्पसको गुणस्तरको जिम्मा प्राध्यापकज्यू हरुले लिनुस्, विद्यार्थीको सहभागिता बढाउनुस् । बाँकी कामको लागि कहाँ जानु पर्छ म सँगै जान्छु । को सँग के माग्नु पर्छ म सँगै गएर माग्छु ।
कार्यक्रमका अवसरमा प्रदेश सांसद तारानारायण श्रेष्ठ, रामेछाप नगरपालिकाका नगर प्रमुख लवश्री न्यौपाने, लिखु तामाकोशी गाउँपालिकाका अध्यक्ष केशव महत, नेपाल पब्लिक क्याम्पस संघ बागमती प्रदेशका अध्यक्ष शैलेन्द्र कुइँकेल, सिद्धेश्वर शिक्षा पब्लिक क्याम्पसका प्रमुख ज्ञानबहादुर खत्री, पत्रकार महासंघ रामेछापका अध्यक्ष बद्री नयाँघरे लगायतले मन्तव्य राखेका थिए ।
रामेछाप जिल्लामा ११ वटा पब्लिक क्याम्पसहरू संचालनमा भएका थिए । तर हाल ९ वटा मात्र नियमित सञ्चालनमा रहेका छन् ।
नेपाल पब्लिक क्याम्पस संघ बागमती प्रदेश समितिका सहसचिव एवं अधिवेशन संयोजक सन्देश घिमिरेको अध्यक्षतामा अधिवेशन संचालन गरिएको थियो ।
नेपाल पब्लिक क्याम्पस संघ रामेछापको अध्यक्षमा डा. भरत सर्वसम्मत चयन
