पौष ३ रामेछाप ।
मन्थलीको देवकोटा चोकदेखि पुरानो कटहरबोटसम्म डिभिजन सडक कार्यालय, खुर्कोट सिन्धुलीले गरेको रोड मार्किङको सम्बन्धमा आलोचना सुरु भएको छ । उक्त स्थानको सडकको बीच भागमा ठेकेदार उमेश कडरिया मार्फत् गरिएको रोड मार्किङ, मार्किङ् गर्दागर्दै लत्पत्तिएर हेरिनसक्नु भएको छ ।
दिउँसोको समयमा सडक अतिव्यस्त हुँदा उक्त सडक मार्किङमा समस्या देखिएको मन्थली बजारका स्थानीयहरुले बताएका छन् । सेतो इनामेलले लगाउँदा लगाउँदै उक्त मार्किङ् लाइनबाट सवारीहरु आवतजावत गर्दा इनामेल लत्पत्तिएको छ भने मार्किङ समेत पुछिएको छ । उक्त कार्यका ठेकेदार कडरियालाई टेलिफोन सम्पर्क गरी मार्किङ कार्यमा समस्या देखाउँदा सवारी चालकहरुले आफ्नो कार्यलाई सहयोग नगरी इनामेल नसुक्दै सवारी चलाएर समस्या देखिएको बताएका छन् ।
उक्त मार्किङको बारेमा कुराकानी गर्दै कडरियाले भने, ‘म आफ्ना कामदारहरुलाई काम लगाएर विशेष कामले सिन्धुली आएको छु । सडकमा लगाएको मार्किङ् कामै नलाग्ने भएर लत्पत्तिएको रहेछ भने पुनः त्यसलाई भोलि मार्किङ गर्नेछु । भन्न त मैले स्थानीय ट्राफिकलाई सडक मार्किङको बारेमा जानकारी गराएको थिएँ । मैले सडक विभागले तोकेको मापदण्ड अनुसार नै काम गरेको हूँ ।’
सडक मार्किङमा इनामेललाई निकै पातलो बनाई लगाउनुले पनि सो समस्या आएको स्थलगत अवलोकन गर्दा देखिएको छ । यस सम्बन्धमा थप जानकारी लिन डिभिजन सडक कार्यालय खुकोर्टका इन्जिनियर रामबहादुर विश्वकर्मालाई टेलिफोन सम्पर्क गर्दा उनले फोन उठाएनन् ।
