जेठ २,
रामेछाप ।कोरोना भाइरस (कोभिड १९) ले देश लकडाउन भएका कारण तरकारी उत्पादक कृषकहरु मारमा परेका छन् । बारीमा उत्पादित तरकारी बजार सम्म लैजान र तरकारी बालीका लागि आवश्यक मलखाद र अन्य सामग्रीहरुको ढुवानीको समस्या रहेको मन्थलीका तरकारी उत्पादक कृषकले गुनासो गरेका छन् । जनताभ्वाइससँग कुराकानी गर्दै मन्थली १ का जानेमाने तरकारी उत्पादक कृषक युवराज श्रेष्ठले लकडाउनका कारण आफ्नो व्यवसायलाई निकै नै समस्या परेको बताएका हुन् ।
विगत केही वर्षदेखि मन्थलीको आकाशेमा तरकारी खेतीगर्दै गरेका श्रेष्ठले आफूलाई तरकारी बजारमा लैजान र तरकारीका लागि आवश्यक पर्ने मलखाद ढुवानी गर्न समस्या रहेको बताएका हुन् । आफ्नो बारीमा विभिन्न जातका तरकारीहरु फलाएर मन्थली बजारको तरकारीको मागलाई धानिरहेका श्रेष्ठले यो सिजनमा बन्दा, करेला, काँक्रा, गोलभेडा, गाँजर, फर्सी लगायतका दैनिक उपभोग्य तरकारीहरु उत्पादन गरिरहेका छन् । ‘तरकारी उत्पादन गर्न त मलाई खासै समस्या होइन तर उत्पादिन तरकारीलाई ग्राहकको हातसम्म पु¥याउन र तरकारीका लागि चाहिने मलखाद बारी सम्म ल्याउन धेरै नै समस्या पर्ने गरेको छ । सम्बन्धित पक्षले यो समस्यालाई समयमै सम्बोधन गरिदिए हुन्थ्यो ।’ कृषक श्रेष्ठले भने ।
श्रेष्ठलाई यतिबेला तरकारीका लागि आवश्यक पर्ने मलखाद र भर्खरै लहरा लाग्दै गरेको बोडीलाई थाँक्राको लागि बाँस ल्याउन समस्या परेको छ । श्रेष्ठले मन्थली ४ स्थित गैराथोकमा आफूलाई आवश्यक पर्ने बाँस खरिद गरी राखेको र सो बाँस ल्याउन ढुवानीको समस्या परेको बताएका छन् । कुराकानीको क्रममा उनी भन्छन्, ‘मैले यो बोडीका लागि आवश्यक पर्ने थाँक्राको लागि बाँस किनिसकेको छु । अब त्यो बाँस ल्याउन सकिँन भने यो बोडीले उत्पादन दिँदैन ।’
जिल्ला प्रशासन कार्यालयले कोभिड १९ को संक्रमण नियन्त्रणका लागि भन्दै तराईबाट आयात गर्ने तरकारीका रोक लगाएको छ । जति नियन्त्रणको प्रयास भएको भएपनि चोर बाटोबाट रातारात तरकारी भित्रिएका छन् । यसकारण बजारमा रामेछापका कृषकहरूले उत्पादन गरेको तरकारीको पहुँच हुन नसकेको श्रेष्ठको भनाई छ । उनी भन्छन्, ‘तराइबाट आउने तरकारीमा नियन्त्रण गर्न सकिन्न भने हामीलाई पनि त हाम्रो तरकारीका लागि आवश्यक पर्ने सामग्री ल्याउन लैजान पनि त रोक्नु भएन नि ?’ उनी प्रतिप्रश्न गर्छन् ।
कोरोना भाइरसले विश्वव्यापी रुपमा महामारीको रुप लिएको आवस्थामा शहर केन्द्रीत युवा जनशक्तिहरु गाउँमा भित्रिएका छन् । यस्तो अवस्थामा गाउँमा बाँझा रहेका जमिनहरुलाई अब पसिनाको खाँचो छ । यस्ता जमिनहरुलाई अबका दिनमा खनिखोस्री गर्नुुपर्ने आवश्यकता रहेको कृषक श्रेष्ठले जनताभ्वाइसँग बताएका छन् ।
