असार १७, जनता भ्वाइस संवाददाता,
रामेछाप । जिल्ला प्रशासन कार्यालय, रामेछापले लकडाउनका व्यवसायीहरुका लागि व्यवसायिक मोडल परिवर्तन गरेको छ । जिल्लाभर संचालन हुने व्यवसायको हकमा यस अघि बिहान ६ बजेदेखि दिउँसो १ बजेसम्म व्यापार व्यवसाय संचालन गर्न दिने भनिएकोमा बुधबार जारी गरिएको एक सूचना अनुसार भोलि बिहिबार देखि बिहान ६ बजेदेखि बेलुका ७ बजेसम्मको लागि व्यवसाय गर्ने समायावधि तोकेको छ । उल्लेखित् सूचनानुसार स्टोर या विक्रेताले पसल परिसरमा सबुन पानी वा स्यानिटाइजरले हात धुने व्यवस्था मिलाउने, व्यवसाय परिसरमा सरसफाई गरी निश्चित दूरी कायम गरी खरिद र विक्रीको व्यवस्था मिलाउने र अनावश्यक भिड लाग्न नदिने जिम्मेवारी सम्बन्धित स्टोर र विक्रेता र व्यवसायीको हुनेछ भन्ने शर्त तोकिएको छ ।
त्यस्तै खरिद र विक्रीको लागि आएका व्यक्तिलाई अनिवार्य रुपमा मास्क लगाउन सुसूचित गर्ने, व्यवसायीले व्यवसाय सञ्चालन गर्दा विश्व स्वास्थ्य संगठन तथा नेपाल सरकारबाट निर्देशित जनस्वास्थ्य र सुरक्षाका मापदण्डहरूको पूर्ण पालना गर्ने र गराउने व्यवस्था मिलाउने, सकेसम्म दैनिक उपभोग्य वस्तुको प्याकेज बनाई विक्री वितरण गर्ने र ढुवानी साधनमा चालक र सह–चालक बाहेक मानिसहरु ओसार पसार नगर्ने जस्ता शर्तहरु सूचना मार्फत जिल्ला प्रशासन कार्यालयले जारी गरेको छ । यस्तो सूचनाको उलंघन गर्नेलाई प्रचलित कानुन बमोजिम कारवाही गर्ने बारेमा समेत जिल्ला प्रशासन कार्यालयले कडाईका साथ निर्देशन दिएको छ ।
