भदौ २९, काठमाण्डौ ।
कोरोना भाइरसको संक्रमणका कारण देशमा पछिल्लो २४ घण्टामा थप १५ जनाको मृत्यु भएको स्वास्थ्य तथा जनसंख्या मन्त्रालयले पुष्टि गरेको छ । प्रवक्ता डा। जागेश्वर गौतमका अनुसार काठमाडौंमा एक महिला सहित ६ जना गरी उपत्यकाभित्र ८ जनाको मृत्यु भएको छ ।
काठमाडौंमा एकजना ६१ वर्षिया महिलाको कोरोनाबाट मृत्यु भएको छ । यस्तै ७७, ६२, ७३, ८५ र ७० वर्षिय पुरुषको कोरोनाबाट मृत्यु भएको छ । यस्तै ललितपुरमा ५५ र भक्तपुरमा ७३ वर्षिय पुरुष तथा रामेछापमा २३, मोरङमा ४० र ७० वर्षिय पुरुषको पनि कोरोनाबाट मृत्यु भएको उनले बताए । यस्तै गोरखामा ६३, नवलपरासीमा ६२, पर्सामा ५५ र कपिलवस्तुमा ४७ वर्षिया महिलाको मृत्यु छ । योसँगै नेपालमा आजसम्म कोरोनाबाट मृत्यु हुनेको संख्या ३ सय ६० पुगेको छ ।
नेपालमा पछिल्लो २४ घण्टामा थप १ हजार १ सय ७० जनामा कोरोना भाइरसको संक्रमण पुष्टि भएको छ । यो सँगै कोरोना संक्रमितको संख्या ५२ हजार ३२९ पुगेको छ । नेपालमा हालसम्म सक्रिय संक्रमितको संख्या १५ हजार ३९३ रहेको छ । यस्तै पछिल्लो २४ घण्टामा थप ८७९ जना कोरोना संक्रमणमुक्त भएका छन् । योसँगै नेपालमा कोरोना संक्रमण भएर निको हुनेको संख्या हालसम्म ३९ हजार ५७६ पुगेको छ ।
यस्तै काठमाडौं उपत्यकामा आज थप ५१२ जनामा कोरोना संक्रमण पुष्टि भएको छ । आज थपिनेमा काठमाडौंका ४४०, ललितपुरका २९ र भक्तपुरका ४३ जना रहेका छन् ।
यसैवीच सरकारले कोभिड–१९ को पीसीआर परीक्षणका लागि तोकेको अधिकतम शुल्क दुई हजार रुपैयाँ कार्यान्वयन गर्न निर्देशन दिएको छ ।
स्वास्थ्यमन्त्री भानुभक्त ढकालले घटेको शुल्कमा पीसीआर परीक्षण गराउन प्रयोगशालाहरुलाई निर्देशन दिनुभएको हो । मन्त्रालयले हिजो राष्ट्रिय तथा अन्तर्राष्ट्रिय बजारमा पीसीआर परीक्षण गर्ने रिएजेन्ट र अन्य सामान घटेका आधारमा नेपालमा पीसीआर परीक्षणको अधिकतम शुल्क दुई हजार रुपैयाँ तोकेको थियो ।
