रामेछाप । रामेछाप जिल्लाको खाँडादेवी गाउँपालिकामा रहेको प्रशिद्ध मन्दिर खाँडादेवी मन्दिरमा बन्ने भनिएको केवलकारको योजना अन्यौलमा परेको छ । खाँडादेवी गाउँपालिका प्रमुख प्रेम तामाङले केवलकार निर्माणको लागि सरकारले लगानी गर्न नमिल्ने भएकाले उक्त केबलकारको भविष्य अन्यौल रहेको बताएका छन् । प्रदेश सरकारले केवलकार निर्माणको लागि लगातार दुई वर्ष बजेट विनियोजन गरेको भए पनि सरकारको लगानीमा केवलकार निर्माण गर्न नहुने भएसँगै योजना अलपत्र परेको गाउँपालिका प्रमुख तामाङले जानकारी दिए । पालिकाका अध्यक्ष तामाङका अनुसार सरकारले लगानी गर्न नमिल्ने भए पछि मनकामना केवलकार र चन्द्रागिरी केबल कार सञ्चालन गर्ने पक्षसँग खाँडादेवीमा केबलकार निर्माणका लागि कुराकानी भएको तर उक्त पक्ष दुवैले खाँडादेवीमा सडक सुविधा भएकाले लगानी नउठ्ने हो कि भन्ने मनसाय व्यक्त गरेको बताए । लगानी कर्ताहरुले “तपाईहरुले मन्दिर नजिकै कालोपत्रे सडक लैजानु भएकाले केबलकारको लगानी उठाउन गाह्रो होला कि ? भनेर भन्नु भएको छ ।” तामाङले भने । त्यसैले निजी क्षेत्रको लगानीको बारेमा पनि टंगोमा पुग्न नसकिएको तामाङको भनाई छ ।
वी.पी राजमार्गको रातामाटादेखि खाँडादेवी गाउँपालिका तर्फको सडक कालोपत्रे भइसकेको छ । कालोपत्रे सडकबाट मन्दिर केही मिनेटमै पुग्न सकिने भएकाले दर्शनार्थीलाई मन्दिर दर्शन सहज वनेको छ । वी.पी राजमार्गबाट झण्डै आधा घण्टामा मन्दिरमा पुग्न सकिने तामाङले वताए ।
गएको निर्वाचनमा एमालेका उम्मेदवार कैलाशप्रसाद ढुंगेलले खाँडादेवी मन्दिर सम्मको केबलकार निर्माण गर्ने योजना घोषणा पत्रमा सार्वजनिक गरेका थिए । निर्वाचनमा विजयी भएपछि बाग्मती प्रदेश सरकारको आर्थिक मामिला तथा योजना मन्त्री भएका उनले केबलकारको सम्भाव्यता अध्ययन गर्न लगाएका थिए । सम्भाव्यता अध्ययनले रातामाटादेखि खाँडादेवी मन्दिरसम्म पुग्ने केबलकार निर्माणको करिव साँढे २ अरब लगानी लाग्ने अनुमान गरेको थियो । झण्डै ९ किलोमिटर लामो उक्त केबलकार निर्माणका लागि बाग्मती प्रदेश सरकारले लगातार २ बर्ष बजेट समेत विनीयोजन गरेको थियो ।
केबलकारको भविष्य अन्यौलः गाउँपालिका प्रमुख तामाङ
