रामेछाप । रामेछाप जिल्ला सदरमुकाम मन्थलीमा रहेको मन्थली माध्यामिक विद्यालयका एक शिक्षकले छात्रालाई दुव्र्यवहार गरेको भन्दै विद्यार्थीहरू आन्दोलित बनेका छन् । मन्थली माविको सीटीईभीटी अन्तर्गतको विज्ञान विषय अध्यापन गराउने शिक्षक लोकबहादुर विष्टले सो विद्यालयमा अध्ययनरत एक छात्रालाई दुव्र्यवहार गरेको भन्दै विद्यार्थीहरू आन्दोलित भएका हुन् ।
दोषी शिक्षकलाई कडा कारबाहीको माग गर्दै उनीहरुले शुक्रबार विद्यालयमा विरोध प्रदर्शन गरेका थिए । प्रदर्शनका क्रममा बिद्यार्थीहरुले कक्षा कोठाका केही डेक्स बेञ्च समेत तोडफोड गरेका छन । विद्यालय समयमा विद्यालय परिसर भित्रै ती शिक्षकले बिहीबार तीन वर्षे सब ओभरसियरको प्रथम वर्षमा अध्ययनरत छात्रलाई गलत नियतले हातपात गरेको विद्यार्थीको आरोप छ । ती शिक्षकले यस अघि पनि सामाजिक सञ्जाल मार्फत विद्यार्थीलाई गाली गलौज र दुव्र्यवहार गरेको भन्दै विद्यार्थीहरुले विद्यालय प्रशासनमा उजुरी गरेपछि पीडित पक्ष, विद्यार्थी संगठन समेतलाई राखी गराइएको छलफलमा शिक्षकले गल्ति स्विकार गर्दै माफि मागेका थिए । उनले माफी मागि गल्ति स्विकारेपछि पीडित छात्राका अभिभावकले माफी दिएका थिए ।
यस्ता कृयाकलापमा संम्लग्न उनै शिक्षकबाट फेरी घटना दोहोरिएपछि विद्यार्थीहरु कुनै हालतमा पनि माफी दिन नहुने बताएका छन् । ती शिक्षकलाई विद्यालयबाट हटाउनु पर्ने माग विद्यार्थीको रहेको छ । विद्यार्थीहरु आन्दोलित भएपछि शिक्षक विष्ट फरार भएका छन ।
करार सेवामा नियुक्ति पाएका ती शिक्षकको गतिविधिको बारेमा थाहा पाउनसाथ आफूले फोन गर्दा फोन नउठाएको र उनी बस्ने कोठा समेत ताला लगाएको अवस्थामा रहेको विद्यालयका प्रधानाध्यापक टंकप्रसाद दाहालले बताए । उनको खोजीको लागि प्रहरीलाई विद्यालयले अनुरोध गरिसकेको उनले बताए ।
उनले विद्यालयमा पढाउने नैतिक हैसियत गुमाइ सकेकोले आइतवार नै ब्यवस्थापन समितिको बैठक राखेर उनलाई निलम्बन गर्ने तयारी भैरहेको प्रअ दाहालले बताए ।
