रामेछाप । रामेछापको उमाकुण्ड गाउँपालिकाले चालु आर्थिक वर्षको पहिलो ६ महिनामा झण्डै ३० प्रतिशत बजेट खर्च गरेको छ । गाउँपालिकाको हिउँदे गाउँ सभामा गाउँ कार्यपालिका कार्यालयले सो कुराको जानकारी दिएको हो । सो अवधिमा २९.७१ प्रतिशत बजेट खर्च भएको गाउँपालिका जनाएको छ । गाउँपालिकाको कूल ५९ करोड ७९ लाख रुपैँया बजेट रहेकोमा १७ करोड ७६ लाख ८१ हजार रुपैँया खर्च भएको छ । चालु तर्फ ३९.१२ प्रतिशत र पुँजीगत तर्फ १५.७३ प्रतिशत बजेट खर्च भएको गाउँपालिकाले जनाएको छ । सबैभन्दा बढी कार्यालय सञ्चालन तर्फको बजेट ४४.९९ प्रतिशत अर्थात् १३ करोड २३ लाख ९२ हजार मध्ये ५ करोड ९५ लाख ६१ हजार रुपैँया खर्च भएको छ । सबैभन्दा कम आर्थिक विकास तर्फको ८.५८ प्रतिशत रकम मात्र खर्च भएको छ । आर्थिक विकास तर्फ ५ करोड १५ लाख ५० हजार रुपैँया मध्ये ४४ लाख २० हजार रुपैँया मात्र खर्च भएको छ ।
यसै गरी पूर्वाधार विकास तर्फ १८.९४ प्रतिशत रकम खर्च भएको छ । सो शीर्षकमा १७ करोड ६५ लाख रुपैँया बजेट विनियोजन भएकोमा ३ करोड ३४ लाख ३३ हजार रुपैँया खर्च भएको छ । सुशासन तथा अन्तर सम्बन्धित क्षेत्रमा २ करोड २३ लाख ७६ हजार रुपैँया विनियोजन भएकोमा ४८ लाख ६४ हजार रुपैँया खर्च भएको छ । जुन विनियोजित रकमको २०.८१ प्रतिशत हो । सामाजिक विकास तर्फ ३५.२२ प्रतिशत अर्थात् ७ करोड ५४ लाख रुपैँया खर्च भएको छ । सो शीर्षकमा २१ करोड ४० लाख ४६ हजार रुपैँया बजेट विनियोजन गरिएको थियो । पूर्व तयारी नगरी योजना बनाउँदा कतिपय काम गर्न समस्या भएको गाउँपालिका अध्यक्ष शेरबहादुर सुनुवारले बताउनुभयो । उहाँले गाउँपालिकाले गर्ने काममा व्यक्तिगत स्वार्थ भन्दा माथि उठेर हेरिदिन सबैलाई अनुरोध गर्नुभयो । त्यसो गरियो भने योजना अनुसारको काम गर्न सकिने उहाँको भनाइ छ । गाउँपालिका उपाध्यक्ष सावित्री सुनुवारले गाउँपालिकाका काम प्रति कतिपय नागरिकका गुनासो भएका बताउँदै त्यसलाई सम्बोधन गरेर गाउँपालिका अघि बढ्ने बताउनुभयो । राम्रो काम गर्नेलाई प्रोत्साहित गर्न गाउँपालिकाले सम्मान कार्यक्रम सुरु गरेको उहाँले बताउनुभयो ।
उमाकुण्डको ६ महिनामा झण्डै ३० प्रतिशत बजेट खर्च
