कृषल कन्ट्रक्शनको लापरवाही, मर्मतको एक महिनामै उप्कियो कालोपत्रे

रामेछाप । खिम्ती फर्पू नामाडी सडक मर्मत गरेको एक महिना नबित्दै भत्किन थालिसकेको छ । खिम्ती फर्पू नामाडी सडकको नामाडी बजार नजिकै सडकमा काम सकेको एक महिना नबित्दै कालोपत्रे उप्किन थालेको हो । कतिपय स्थानमा खाल्डा परेर पानी जम्न थालिसकेको छ । सडकमा खाल्डा देखिन थालेको र गाडी गुड्दा कालोपत्रे उप्किने र माटो मुछेर थलथले बनाएर राखेको जस्तो सडकको अवस्था भएपछि स्थानीयले कामको गुणस्तरबारे प्रश्न उठाएका छन् । ‘कालोपत्रे गरेको एक महिना भएको छैन, उप्किन थालेको छ, लाखौँ खर्चेर मर्मत गरेको बेकाम भएको एक स्थानीयले बताए । गुणस्तरहीन काम गर्नेलाई कारबाही गर्नुपर्ने उनको भनाई छ ।
खिम्ती फर्पू नामाडी सडक मर्मतका लागी पूर्वाधार विकास कार्यालयले ४९ लाखमा ठेक्का लगाएको थियो । ठेक्कामा प्लम जाली समेत निर्माण गर्ने योजना थियो । कालोपत्रे उप्कियो भनेर गुनासो आएको थिएन, हामी अनुगमन गरेर के भएको हो बुझ्छौँ’ पूर्वाधार विकास कार्यालयका सब–इन्जिनियर नवराज थापाले भने । एक वर्षसम्मको मर्मत गर्ने जिम्मा ठेकेदारको हुन्छ । ठेकेदारलाई नै बिग्रे भत्केको काम सकार्न तत्काल लगाउने उनले बताए ।
उमाकुण्ड गाउँपालिका वडा नम्बर–५ निवासी सञ्जीव तामाङले ठेकेदारको लापरवाहीका कारण मोटरसाइकलमा सवारहरूलाई समस्या भएको बताए । उनले भने – कालोपत्रे सडक भने ढुक्कले चलाइन्छ । तर बाटो त कच्ची सडक जस्तो चिप्लो रहेछ । मुनीको माटो समेत माथि आई सकेको छ । असारे विकासका कारण हामीले तिरेको करले ठेकेदारको घर बनेको छ, काम गुणस्तरीय छैन ।
निर्माण सामग्री नै कमजोर प्रयोग भएको स्थानीय निर्माण खड्काले बताए । उनले सडक कालोपत्रे गर्ने बेलामा नियामक कार्यालयले प्रभावकारी अनुगमन गर्न नसकेको बताए । ‘काम गर्दा हेलचेक्राई गरेर काम गरे पछि स्वाभाविक रूपमा बाटो भत्किन्छ’ । ठेकेदारले गुणस्तरीय काम नगर्दा जनताले तिरेको करबाट राज्यले गरेको लगानी खोलामा फालेझैँ भएको छ ।
यता ठेकेदार कम्पनी कृषल कन्ट्रक्शनका आधिकारिक व्यक्ती अर्बिन थापा भने आफूले राम्रोसँग काम गरेको बताउँछन् । कृषल कन्ट्रक्शनले गरेको लापरबाहीका कारण मर्मत गरेको सडक रोपाइँका लागी तयार गरेको खेत झैँ भएको छ । सडकको बिचबिचमा खाल्डा परेका छन् । बर्खामा पानी जम्दा बाँकी भाग पनि भत्कँदै गएको छ । तर पनि थापा आफूले राम्रोसँग काम गरेको दाबी गर्छन् ।